**پاکستان نے برطانیہ میں فیلڈ مارشل کے خلاف دھمکیوں پر ڈیمارش جاری کیا**
اسلام آباد: پاکستان نے برطانیہ میں فیلڈ مارشل عاصم منیر کے خلاف دھمکی آمیز احتجاج پر برطانوی ڈپٹی ہیڈ آف مشن میٹ کینل کو وزارت خارجہ طلب کر کے سخت احتجاج درج کرایا ہے۔
ذرائع کے مطابق، برطانوی ہائی کمشنر جین میریٹ کی غیر موجودگی میں قائم مقام ہائی کمشنر کو ڈیمارش جاری کیا گیا، جو برطانیہ کے شہر بریڈفورڈ میں پاکستانی قونصلیٹ کے باہر ہونے والے احتجاج سے متعلق ہے۔
احتجاج کے دوران ایک سیاسی جماعت کے سرکاری اکاؤنٹ کا استعمال کرتے ہوئے مظاہرین جمع کیے گئے، جنہوں نے چیف آف ڈیفنس فورسز کے خلاف انتہائی اشتعال انگیز اور قابل اعتراض زبان استعمال کی۔ مظاہرین نے فیلڈ مارشل کو جان سے مارنے کی دھمکیاں دیتے ہوئے کہا کہ انہیں "کار بم دھماکے میں قتل کر دیا جائے گا۔”
حکومت پاکستان نے برطانیہ کی سرزمین سے دی جانے والی ان دھمکیوں کا سخت نوٹس لیا ہے اور زور دیا ہے کہ برطانیہ اپنی سرزمین کو پاکستان میں عدم استحکام پھیلانے کے لیے استعمال نہ ہونے دے۔ پاکستان نے امید ظاہر کی ہے کہ برطانیہ ایسے شرپسند عناصر کے خلاف فوری اور سخت قانونی کارروائی کرے گا۔
دفتر خارجہ کے ترجمان طاہر حسین نے بھی برطانیہ کے قائم مقام ہیڈ آف مشن کو ڈیمارش جاری کرنے کی تصدیق کی ہے۔
