پاکستان کی غزہ امن معاہدے کی خلاف ورزی پر اسرائیل کی مذمت

اسلام آباد: ترجمان دفتر خارجہ نے غزہ میں امن معاہدے کی اسرائیلی خلاف ورزیوں کی شدید مذمت کرتے ہوئے کہا ہے کہ پاکستان قابض اسرائیلی افواج کے تازہ حملوں کی سخت مخالفت کرتا ہے، جن کے نتیجے میں متعدد بے گناہ فلسطینی شہری شہید ہوئے۔

ترجمان نے کہا کہ یہ حملے شرم الشیخ میں مسلم، عرب ممالک، امریکہ، یورپ اور اقوام متحدہ کی قیادت کی موجودگی میں طے پانے والے امن معاہدے کے سراسر منافی ہیں۔
لاہور میں گلے پر ڈور پھرنے سے نوجوان جاں بحق

پاکستان نے عالمی برادری سے مطالبہ کیا ہے کہ اسرائیلی خلاف ورزیوں کو روکنے اور جنگ بندی کے مکمل نفاذ کو یقینی بنانے کے لیے فوری اور مؤثر اقدامات کیے جائیں۔

دفتر خارجہ کے مطابق فلسطینی عوام کے تحفظ اور انسانی بنیادوں پر امداد کی فراہمی میں حائل رکاوٹوں کو دور کرنا ناگزیر ہے۔

پاکستان نے ایک بار پھر فلسطینی عوام کے ساتھ اپنی غیر متزلزل حمایت کا اعادہ کرتے ہوئے واضح کیا کہ وہ 1967 کی سرحدوں کے مطابق القدس الشریف کو دارالحکومت بنا کر آزاد اور خودمختار فلسطینی ریاست کے قیام کی مکمل حمایت کرتا ہے۔