اسلام آباد ایئرپورٹ: جعلی کاغذات پر یورپ جانے کی کوشش کرنے والے دو مسافر گرفتار

اسلام آباد:
ایف آئی اے امیگریشن نے اسلام آباد انٹرنیشنل ایئرپورٹ پر کارروائی کرتے ہوئے جعلی سفری دستاویزات کے ذریعے یورپ جانے کی کوشش ناکام بنا دی۔

ترجمان ایف آئی اے کے مطابق یورپ روانہ ہونے والے دو مسافروں کو آف لوڈ کر کے گرفتار کر لیا گیا۔ گرفتار افراد کی شناخت فیاض احمد اور نعمان علی کے ناموں سے ہوئی، جو منڈی بہاءالدین کے رہائشی ہیں۔
حکومت نے مذہبی جماعت سے متعلق جعلی خبروں کیخلاف بڑا ایکشن شروع کردیا

ابتدائی تحقیقات میں معلوم ہوا کہ دونوں مسافر فلائٹ نمبر EY303 کے ذریعے اٹلی جا رہے تھے اور امیگریشن حکام کو جعلی اٹلی ریزیڈنٹ کارڈ پیش کیے۔ مزید بتایا گیا کہ ان کے پاسپورٹس پر پاکستانی اور اطالوی امیگریشن کی جعلی مہر بھی لگی ہوئی تھی۔

ایف آئی اے کے مطابق ملزمان نے بھاری رقم کے عوض مختلف ایجنٹوں سے جعلی ریزیڈنٹ کارڈ حاصل کیے تھے۔

گرفتار مسافروں کو مزید قانونی کارروائی کے لیے ایف آئی اے اینٹی ہیومن ٹریفکنگ سرکل اسلام آباد کے حوالے کر دیا گیا ہے، جبکہ تفتیش جاری ہے۔