اسلام آباد: ترجمان دفتر خارجہ نے کہا ہے کہ پاکستان 1967 کی سرحدوں کے مطابق ایک آزاد فلسطینی ریاست کے قیام کی حمایت کرتا ہے، جس کا دارالحکومت القدس الشریف ہو۔
دفتر خارجہ کی جانب سے جاری اعلامیے میں گلوبل صمود فلوٹیلا کو روکنے کی شدید مذمت کی گئی۔ اعلامیے کے مطابق فلوٹیلا میں 40 سے زائد کشتیوں پر 500 سے زیادہ بین الاقوامی کارکنان محصور غزہ کے عوام کے لیے امداد لے جا رہے تھے۔ اسرائیل کی جانب سے انسانی ہمدردی کے کارکنوں کو حراست میں لینا عالمی قوانین کی سنگین خلاف ورزی اور نہتے شہریوں کی زندگیوں کو خطرے میں ڈالنے کے مترادف ہے۔
ترجمان نے کہا کہ غزہ پر غیرقانونی محاصرہ دو ملین سے زائد فلسطینیوں کو اذیت اور محرومی میں مبتلا کر رہا ہے، جب کہ امدادی سامان کی ترسیل میں رکاوٹ ڈالنا چوتھے جنیوا کنونشن کی کھلی خلاف ورزی ہے۔
اعلامیے میں پاکستان نے فوری اور مستقل جنگ بندی کے مطالبے کو دہرایا، غزہ کے غیرقانونی محاصرے کے خاتمے اور انسانی امداد کی بلا رکاوٹ ترسیل پر زور دیا۔ ساتھ ہی فلوٹیلا میں شریک تمام کارکنان کی فوری رہائی کا مطالبہ بھی کیا گیا۔
دفتر خارجہ کے مطابق پاکستان نے عالمی قوانین، انسانی حقوق اور انسانی ہمدردی کے اصولوں کے احترام پر زور دیا اور اسرائیل کو اس کے بار بار کے جرائم پر جوابدہ بنانے کا مطالبہ کیا۔ اعلامیے میں ایک بار پھر اس بات کا اعادہ کیا گیا کہ پاکستان آزاد، خودمختار اور قابلِ عمل فلسطینی ریاست کی حمایت کرتا ہے جو 1967 کی سرحدوں کے مطابق قائم ہو اور جس کا دارالحکومت القدس الشریف ہو۔
