اداکارہ صبا قمر نے دسمبر میں شادی کرنے سے متعلق سوشل میڈیا پر گردش کرنے والی خبروں کی اپنے مخصوص مزاحیہ انداز میں تردید کر دی ہے۔
اداکارہ نے انسٹاگرام پر ایک اسٹوری شیئر کی، جس میں انہوں نے حیرت کا اظہار کرتے ہوئے کہا کہ انہیں اپنی شادی کے بارے میں خود بھی کوئی علم نہیں۔ اگر واقعی ان کی شادی ہونے والی ہے تو انہیں بھی اس کا دعوت نامہ بھیجا جائے۔
صبا قمر نے اپنی مصروفیات کا ذکر کرتے ہوئے کہا کہ ان کا شیڈول اس قدر بھرا ہوا ہے کہ انہیں گھر جانے اور سونے تک کا وقت نہیں مل رہا۔ انہوں نے طنزیہ انداز میں کہا کہ ابھی تک کسی نے انہیں ان کی اپنی شادی میں مدعو نہیں کیا، اس لیے اگر یہ خبر درست ہے تو انہیں بھی کارڈ بھیج دیا جائے۔
اداکارہ کے اس ردعمل سے شادی سے متعلق افواہوں کو نیا رخ مل گیا ہے، جبکہ ان کے دلچسپ تبصرے سے مداح بھی محظوظ ہوئے۔
صبا قمر اپنی نجی زندگی کو عموماً میڈیا کی توجہ سے دور رکھتی ہیں، تاہم ان کے تعلقات اور شادی کے حوالے سے مداحوں میں اکثر تجسس پایا جاتا ہے۔ اس مرتبہ بھی انہوں نے تفصیلی بیان کے بجائے مختصر اور مزاحیہ انداز میں ان خبروں کا جواب دیا ہے۔
