اسلام آباد 31 دسمبر تک پاکستان کا پہلا کیش لیس شہر بن جائے گا، حکومت کا بڑا اعلان
30 نومبر کے بعد اسلام آباد انتظامیہ اور سی ڈی اے کے دفاتر میں نقد ادائیگیاں وصول نہیں کی جائیں گی، 26 ہزار تاجر پہلے ہی ڈیجیٹل ادائیگیوں کے نظام سے منسلک ہوچکے ہیں۔
اسلام آباد: (ویب ڈیسک) وفاقی حکومت نے دارالحکومت اسلام آباد کو پاکستان کا پہلا مکمل کیش لیس شہر بنانے کے منصوبے پر تیزی سے عملدرآمد شروع کردیا ہے، جس کے لیے 31 دسمبر 2026 کی حتمی ڈیڈ لائن مقرر کردی گئی ہے۔
تفصیلات کے مطابق یہ فیصلہ وزیر مملکت برائے داخلہ طلال چوہدری کی زیر صدارت منعقدہ اہم اجلاس میں کیا گیا، جس میں چیئرمین کیپیٹل ڈویلپمنٹ اتھارٹی (سی ڈی اے) سہیل اشرف، بینکنگ سیکٹر کے نمائندگان اور دیگر اعلیٰ سرکاری حکام نے شرکت کی۔
اجلاس سے خطاب کرتے ہوئے طلال چوہدری نے کہا کہ وزیراعظم شہباز شریف اور وفاقی وزیر داخلہ محسن نقوی کی خصوصی ہدایات پر کیش لیس اسلام آباد منصوبے پر تیزی سے کام جاری ہے۔
انہوں نے بتایا کہ وفاقی وزیر داخلہ محسن نقوی نے وزیراعظم سے وعدہ کیا تھا کہ اسلام آباد کو پاکستان کا پہلا کیش لیس شہر اور دنیا کا پہلا کیش لیس دارالحکومت بنایا جائے گا۔
30 نومبر کے بعد سرکاری دفاتر میں نقد ادائیگیاں بند
وزیر مملکت برائے داخلہ طلال چوہدری نے واضح کیا کہ 30 نومبر کے بعد اسلام آباد کیپیٹل ٹیریٹری انتظامیہ اور کیپیٹل ڈویلپمنٹ اتھارٹی کے کسی بھی محکمے میں نقد ادائیگیاں وصول نہیں کی جائیں گی۔ شہریوں کو سرکاری واجبات اور دیگر ادائیگیاں ڈیجیٹل ذرائع سے کرنا ہوں گی۔
انہوں نے مزید بتایا کہ اسلام آباد میں اب تک 26 ہزار تاجر ڈیجیٹل ادائیگیوں کے نظام سے منسلک ہوچکے ہیں، جبکہ 31 دسمبر تک شہر کے تمام کاروباری مراکز کو اس نظام میں شامل کرنے کا ہدف مقرر کیا گیا ہے۔
ریڑھی بانوں سے بڑے کاروباری مراکز تک ڈیجیٹل ادائیگیوں کی سہولت
طلال چوہدری کے مطابق حکومت کا مقصد صرف بڑے کاروباری مراکز کو کیش لیس نظام میں شامل کرنا نہیں بلکہ چھوٹے دکانداروں، ریڑھی بانوں اور عام کاروباری افراد کو بھی ڈیجیٹل ادائیگیوں کی سہولت فراہم کرنا ہے۔
انہوں نے کہا کہ اس نظام کے نفاذ سے مالیاتی شفافیت میں اضافہ ہوگا، ٹیکس کی نگرانی بہتر ہوگی اور کاروباری لین دین کو جدید خطوط پر استوار کرنے میں مدد ملے گی۔
اجلاس میں بینکنگ سیکٹر کے نمائندگان نے بھی منصوبے کی کامیابی کے لیے حکومتی کوششوں میں تعاون کی یقین دہانی کروائی۔
حکومت کے مطابق تمام متعلقہ ادارے باہمی اشتراک سے کام کر رہے ہیں تاکہ اسلام آباد کو جدید ڈیجیٹل دارالحکومت بنایا جاسکے اور شہریوں کو نقد رقم کے بجائے آسان اور محفوظ ڈیجیٹل ادائیگیوں کی سہولت میسر آسکے۔
