کراچی کے ایم اے جناح روڈ پر واقع گل پلازہ میں تیسرے درجے کی آگ لگنے کے نتیجے میں 6 افراد جاں بحق ہوگئے۔ کئی گھنٹے گزرنے کے بعد بھی آگ پر قابو نہ پایا جاسکا اور آگ کی شدت سے عمارت کے کئی حصے گر گئے۔
ہفتے کی رات سوا دس بجے کے قریب گل پلازہ کے گراؤنڈ فلور پر آگ لگی جو دیکھتے ہی دیکھتے تیسری منزل تک پہنچ گئی۔
ریسکیو ذرائع کا کہنا ہے کہ آگ لگنے کے باعث ایک فائر فائٹر سمیت 6 افراد جاں بحق ہوئے جبکہ 20 افراد زخمی ہوئے جنہیں اسپتال منتقل کیا گیا۔ ان کی حالت بھی تشویشناک بتائی جارہی ہے۔
جاں بحق افراد میں سے چار کی شناخت فراز، کاشف، عامر اور شہروز کے نام سے ہوئی ہے جبکہ حکام کے مطابق فرقان نامی فائر فائٹر کی لاش بھی ٹراما سینٹر لائی گئی۔
فائر بریگیڈ حکام کے مطابق 20 فائر ٹینڈرز اور 4 اسنارکلز کی مدد سے آگ پر قابو پانے کی کوششیں جاری ہیں۔ پانی اور فوم کا استعمال کیا جارہا ہے اور پاک بحریہ کے فائر ٹینڈرز بھی آگ بجھانے میں مصروف ہیں۔
آگ لگنے کے باعث گراؤنڈ فلور کی تمام دکانیں جل گئیں۔ فائر فائٹرز کو عمارت میں تپش کے باعث اندر جانے میں مشکلات پیش آرہی ہیں۔ شاپنگ پلازہ میں ایک ہزار 200 سے زائد دکانیں ہیں۔
چیف فائر آفیسر کا کہنا ہے کہ عمارت میں زوردار دھماکا ہوا جس کے بعد آگ مزید پھیل گئی ہے۔ دھماکا گیس لیکج کے باعث ہوا۔
ریسکیو حکام کے مطابق آگ کی وجہ سے عمارت کے پلرز کمزور ہوگئے ہیں اور متعدد دراڑیں پڑ گئی ہیں۔ عمارت انتہائی پرانی ہونے کے باعث گرنے کا خدشہ ہے۔
ریسکیو حکام نے بتایا کہ آتش گیر سامان کے باعث آگ کی شدت میں اضافہ ہوا۔ عمارت میں کتنے لوگ ہیں یہ تعداد بتانا مشکل ہے۔
ریسکیو آپریشن کے دوران فائر بریگیڈ کی سیڑھیاں ٹوٹنے سے 2 افراد گر کر زخمی ہو گئے۔
ترجمان ریسکیو کا کہنا ہے کہ آگ کی وجہ سے عمارت کے پلرز کمزور ہوگئے ہیں۔ عمارت انتہائی پرانی ہونے کے باعث گرنے کا خدشہ ہے اور عمارت میں کتنے لوگ ہیں ان کی تعداد بتانا مشکل ہے۔
سائنس کی بڑی کامیابی، انٹارکٹیکا کے نیچے چھپے راز سامنے آ گئے
اس سے قبل صدر گل پلازہ تاجر ایسوسی ایشن تنویر پاستا نے کہا کہ عمارت سے تمام کسٹمر نکل چکے۔ وزیراعلیٰ سندھ اور میئر کراچی کسی نے ابھی تک رابطہ نہیں کیا۔
انہوں نے کہا کہ صرف گورنر سندھ آئے اور کوئی نہیں آیا۔ عمارت میں 1200 دکانیں ہیں اور اربوں روپے کا نقصان ہوا۔ آگ مصنوعی پھولوں کی دکان پر لگی تھی جو پھیلتی چلی گئی۔
گل پلازہ سے نکلنے والے ایک شخص نے بتایا کہ گراؤنڈ فلور پر موجود مسجد کا دروازہ توڑ کر باہر نکلے۔
ایک ملازم نے بتایا کہ ہر دکان میں کروڑوں کا مال تھا اور بہت نقصان ہوا ہے۔ ایک اور متاثرہ شخص نے کہا کہ آکسیجن کی کمی کے باعث سانس لینا دشوار تھا۔ متعدد لوگ بے ہوش ہوئے اور کچھ لوگ برابر والی عمارت پر چھلانگ لگا کر نیچے اترے۔
پیپلز پارٹی کے چیئرمین بلاول بھٹو زرداری نے وزیراعلیٰ سندھ اور میئر کراچی کو آگ بجھانے کے لیے تمام وسائل استعمال کرنے کی ہدایات کیں۔
بلاول بھٹو زرداری نے آتشزدگی سے جانی و مالی نقصان پر افسوس کا اظہار کرتے ہوئے جاں بحق افراد کے خاندانوں سے تعزیت کا اظہار کیا۔ انہوں نے واقعے کی فوری تحقیقات اور آئندہ ایسے واقعات کی روک تھام کی ہدایت بھی کی۔
ترجمان سندھ حکومت کا کہنا ہے کہ تمام وسائل فراہم کیے جارہے ہیں اور حکومت کی کوشش ہے کہ آگ پر جلد از جلد قابو پایا جائے۔
