غیرسرکاری تنظیم رویتِ ہلال ریسرچ کونسل نے پاکستان میں شعبان کے چاند سے متعلق پیشگوئی کر دی ہے۔ کونسل کے سیکرٹری جنرل خالد اعجاز مفتی نے کہا ہے کہ چاند اتوار 18 اور پیر 19 جنوری 2026ء کی درمیانی شب پاکستانی وقت کے مطابق رات 12 بج کر 52 منٹ پر پیدا ہوگا۔ ان کا کہنا ہے کہ 19 جنوری بروز پیر کو غروبِ آفتاب کے وقت چاند کی عمر 18 گھنٹوں سے کم ہو گی جبکہ ہلال کی رویت کے لیے چاند کی عمر کم از کم 19 گھنٹے ہونا ضروری ہے۔
سرکاری گندم کی ترسیل میں تاخیر، آٹا مزید مہنگا ہونے کا امکان
خالد اعجاز مفتی نے مزید کہا ہے کہ 19 جنوری پیر کو شعبان کا چاند نظر آنا ممکن نہیں ہے جس کے بعد شعبان 1447 ھ کا آغاز 21 جنوری بروز بدھ سے ہو گا۔ غیر سرکاری تنظیم کے مطابق غروبِ شمس اور غروبِ قمر کے درمیان فرق بھی مطلوبہ معیار پر پورا نہیں اترے گا۔ گلگت اور مظفر آباد میں یہ فرق 29 منٹ، پشاور، اسلام آباد، لاہور اور چارسدہ میں فرق 30 منٹ، کوئٹہ میں 31 منٹ جبکہ کراچی اور جیوانی میں یہ فرق 33 منٹ ہوگا۔
چاند کی رویت کے لیے غروبِ شمس اور غروبِ قمر میں کم از کم 40 منٹ کا فرق ضروری سمجھا جاتا ہے جو اس بار پورا ہوتا نظر نہیں آ رہا۔ اس طرح 20 جنوری کو چاند نظر آنے کا امکان ظاہر کیا گیا ہے۔ ریسرچ کونسل کی جانب سے فراہم کردہ ان تکنیکی معلومات کی روشنی میں پیر کی شام چاند نظر آنے کے آثار بہت کم ہیں اور ماہِ شعبان کا باقاعدہ آغاز بدھ سے ہونے کی توقع ہے۔
رویتِ ہلال ریسرچ کونسل کی جانب سے جاری کردہ اس رپورٹ میں موسمیاتی اور فلکیاتی پیرامیٹرز کو بنیاد بنایا گیا ہے۔ تاہم کونسل نے واضح کیا ہے کہ چاند کی رویت کا حتمی اور شرعی اعلان مرکزی رویت ہلال کمیٹی ہی کرے گی۔ فی الحال مختلف شہروں میں غروبِ شمس و قمر کے فرق اور چاند کی عمر کے حوالے سے ڈیٹا جاری کر دیا گیا ہے تاکہ پیشگی معلومات فراہم کی جا سکیں۔
