اسلام آباد:صدر مملکت ڈاکٹر عارف علوی نے یونائیٹڈ بینک لمیٹڈ کو فراڈ سے متاثرہ صارف کو منافع کے ساتھ رقم واپس کرنے کا حکم دیدیا۔
صدر مملکت نے یو بی ایل کی جانب سے بینکنگ محتسب کے فیصلے کے خلاف درخواست مسترد کرتے ہوئے اپنے فیصلے میں ہدایت کی کہ تمام بینک آن لائن فراڈ روکنے کیلئے نظام میں خامیوں کو دور کریں اور صارفین کو ڈیجیٹل بینکنگ کے بارے میں آگاہ کریں، ڈیجیٹل بینکنگ فعال کرنے سے پہلے صارفین کو آن لائن فنڈز کی منتقلی کی سہولت کے فوائد اور نقصانات کے بارے میں تعلیم دیں ، تمام بینک آن لائن فنڈز کی منتقلی کی سہولت، صارفین کی رضامندی کے حوالے سے اسٹیٹ بینک کے متعلقہ قواعد و ضوابط کی تعمیل کریں، متنازعہ لین دین کی شکایت مسترد ہونے پر صارف کو سادہ خط میں بینکنگ محتسب سے ریلیف کیلئے رجوع کرنے کا بتایا جائے۔
ایوان صدر کے پریس ونگ کے مطابق عبدالرؤف (شکایت کنندہ ) کو بینک کی ہیلپ لائن سے ملتے جلتے فون نمبر سے کال موصول ہوئی جس میں کالر نے تعارف بینک نمائندے کے طور پر کرایا اور صارف کی بینکنگ تفصیلات طلب کیں، جو اس نے فراہم کیں۔ بعد میں، صارف کے اکاؤنٹ سے 79,500 روپے کی رقم آن لائن ٹرانسفر کی گئی۔ صارف نے کھوئی ہوئی رقم کی واپسی کے لیے بینک سے رجوع کیا لیکن ریلیف نہ ملا۔ صارف نے معاملہ بینکنگ محتسب کے سامنے اٹھایا، جس نے اس کے حق میں احکامات جاری کیے۔
بینک نے بینکنگ محتسب کے فیصلے کے خلاف صدر مملکت کو درخواست دائر کی۔ درخواست پر فیصلہ کرنے سے قبل صدر مملکت نے کیس کی ایوان صدر میں سماعت کی۔ بینک نے سماعت میں مؤقف اختیار کیا کہ شکایت کنندہ کے بینک اکاؤنٹ سے متعدد چھوٹی رقوم کی 16 ٹرانزیکشنز کی گئیں، شکایت کنندہ کو اپنی ذاتی تفصیلات کو محفوظ رکھنا چاہیے تھا، متنازعہ لین دین کا بینک کو ذمہ دار نہیں ٹھہرایا جا سکتا۔ بنک کی جانب سے مزید کہا گیا کہ صارف نے خود اپنی بینکنگ کی معلومات کالر کے ساتھ شیئر کی۔
سماعت کے دوران صدر مملکت نے کہا کہ بینک دو مختلف مراحل کو ایک دوسرے کے ساتھ الجھا رہا ہے۔ پہلا مرحلہ آن لائن ٹرانسفر کی سہولت کھولنے کیلئے صارف کی رضامندی حاصل کرنا ہے، دوسرا مرحلہ آن لائن بینکنگ لین دین سے پہلے صارف کی تصدیق کرنا ہے، بینک نے آن لائن چینل صارف کی رضامندی کے بغیر اور صارف کو سہولت کے فوائد اور نقصانات کے بارے میں بتائے بغیر کھولا۔ صدر مملکت نے کہا کہ بینک صارف ڈیجیٹل بینکنگ سے واقف نہیں، بلا اجازت آن لائن فنڈز ٹرانسفر سہولت کھولے بغیر فراڈ ممکن نہیں تھا۔
صدر مملکت نے قرار دیا کہ بینک نے اسٹیٹ بینک کی ہدایات کی تعمیل نہیں ، یونائیٹڈ بینک کی جانب سے اسٹیٹ بینک کی ہدایات کی عدم تعمیل بدانتظامی کے مترادف ہے، اس لئے بینک کی درخواست مسترد کی جاتی ہے ، بینک اپنے نظام کو بہتر بنائے۔ صدر مملکت نے اپنے فیصلے میں کہا کہ بینک اکاؤنٹس کھولنے کے وقت صارفین کو معلومات فراہم کی جائیں، بینک 30 دنوں کے اندر منافع کے ساتھ 79,500 روپے صارف کو واپس کرے۔
