برطانیہ میں گاڑیوں کی چوری کے واقعات میں غیر معمولی اضافہ ہوا ہے۔ بین الاقوامی خبر رساں اداروں کے مطابق گاڑیوں کی چوری سے متعلق تازہ اعداد و شمار میں بتایا گیا ہے کہ گزشتہ برس ملک بھر سے ایک لاکھ سے زیادہ کاریں غائب ہوئیں۔ رپورٹ کے مطابق 2024ء کے دوران اوسطاً ہر روز تقریباً 320 گاڑیاں چوری ہوئیں، جس نے حکام اور گاڑیوں کے مالکان کو تشویش میں مبتلا کر دیا ہے۔
اسلام آباد میں شہریوں کی سہولت کے لیے 7 مقامات پر ایم ٹیگ مراکز قائم
اعداد و شمار کے تجزیے میں سامنے آیا ہے کہ جدید گاڑیوں میں نصب بغیر چابی اسٹارٹ ہونے والی ٹیکنالوجی تیزی سے بڑھتی ہوئی چوری کی سب سے بڑی وجہ بنی ہے۔ چور الیکٹرانک ڈیوائسز کے ذریعے کار کی چابی کا سگنل حاصل کر کے چند منٹ میں گاڑی کو فعال کرتے ہیں اور دیدہ دلیری سے فرار ہو جاتے ہیں۔
ماہرین کے مطابق یہ ٹیکنالوجی جہاں سہولت فراہم کرتی ہے وہیں جرائم پیشہ افراد کے لیے گاڑیاں چرا کر غائب کرنا پہلے سے کہیں زیادہ آسان بنا چکی ہے۔
بڑھتے ہوئے ان واقعات کے بعد برطانوی حکومت نے سخت کارروائی کا فیصلہ کیا ہے۔ نئے قانون کے تحت ایسی الیکٹرانک ڈیوائسز رکھنا، ان کی ترسیل یا شیئرنگ جرم قرار دی گئی ہے، جس پر 5 سال تک قید کی سزا سنائی جا سکتی ہے۔
حکام کا کہنا ہے کہ ان سخت اقدامات کا مقصد گاڑیوں کی چوری میں استعمال ہونے والی ٹیکنالوجی کے پھیلاؤ کو روکنا اور اس جرم میں ملوث نیٹ ورکس کے خلاف کارروائی کو مؤثر بنانا ہے۔
