پاکستان: چیف آف آرمی اسٹاف جنرل سید عاصم منیر نے پاکستان بھر سے مختلف جامعات کے طلباء سے ملاقات اور بات چیت کی۔ اس دوران انہوں نے پاکستانی عوام، خاص طور پر نوجوانوں کے ساتھ پاک فوج کے مضبوط رشتہ پر زور دیا۔
آرمی چیف نے کہا کہ "پاکستانی عوام کا پاک فوج سے ایک انتہائی مضبوط رشتہ ہے اور ملک دشمن عناصر کی فوج اور عوام کے درمیان خلیج ڈالنے کی کوشش ہمیشہ ناکام رہی ہے اور رہے گی، انشاءاللہ۔”
انہوں نے مزید کہا کہ "ہمیں اپنے مذہب، تہذیب اور روایات پر فخر ہے۔ پاکستان کے آئین کا آغاز بھی اِنَّ الحکم اِلَّاللّٰہ (حاکمیت صرف اللّٰہ کی ہے) سے ہوتا ہے۔ یہ فتنہ الخوارج کس شریعت اور دین کی بات کرتے ہیں؟” آرمی چیف نے اس بات پر بھی زور دیا کہ "ہم کبھی بھی فتنہ الخوارج کو اپنی فرسودہ سوچ ملک پر مسلط نہیں کرنے دیں گے۔”
آرمی چیف نے خیبر پختونخواہ اور بلوچستان کے غیور لوگوں کی دہشت گردوں کے خلاف مضبوط مزاحمت کو سراہتے ہوئے کہا کہ "غیور خیبر پختونخواہ اور بلوچستان کے غیور لوگ دہشت گردوں کے خلاف آہنی دیوار کی طرح کھڑے ہیں۔”
انہوں نے اپنے خطاب میں یقین دلایا کہ "پاکستان کے عوام اور فوج کے درمیان مضبوط رشتہ ہمیشہ قائم رہے گا، اور دشمن کبھی بھی ہماری ہم آہنگی کو نقصان نہیں پہنچا سکے گا۔”
یہ ملاقات نوجوانوں کی حوصلہ افزائی اور ان کے قومی ذمہ داریوں کو سمجھنے کے لیے ایک اہم موقع تھا، جس میں آرمی چیف نے پاکستان کی سلامتی، اتحاد اور مستقل ترقی کے لیے قوم کے عزم کو مزید مستحکم کرنے کی ضرورت پر زور دیا۔
