نیپرا میں بجلی کی تقسیم کار کمپنیوں (ڈسکوز) کی جانب سے سکیورٹی ڈیپازٹ میں اضافے کی درخواست پر سماعت ہوئی، جس میں آٹھ ڈسکوز نے اپنی تجاویز پیش کیں۔
نمائندہ ڈسکوز کے مطابق تمام آٹھ کمپنیوں کی سکیورٹی ڈیپازٹ پالیسی کی بنیادی میتھوڈولوجی ایک جیسی ہے، تاہم قیسکو، ٹیسکو اور فیسکو نے کچھ مختلف طریقہ کار اپنایا ہے۔ ان کا کہنا تھا کہ فیسکو کا طریقہ کار زیادہ حقیقت پسندانہ ہے۔
سماعت کے دوران ممبر نیپرا رفیق احمد نے استفسار کیا کہ سکیورٹی ڈیپازٹ کیا ہے اور صارفین سے کیوں وصول کیا جاتا ہے؟ جس پر نمائندہ ڈسکوز نے وضاحت دی کہ بجلی کمپنیاں صارفین کو فراہم کرتی ہیں اور ان کے ممکنہ ڈیفالٹ سے بچاؤ کے لیے سکیورٹی ڈیپازٹ وصول کیا جاتا ہے۔
کراچی میں ہونیوالی امن مشقیں دنیا کیلئے بڑا پیغام ہیں:کمانڈر ایرانی بحریہ
نمائندہ ڈسکوز کا مزید کہنا تھا کہ جب کسی صارف کا کنکشن کاٹنے کی نوبت آتی ہے تو وہ تقریباً 70 دن تک بجلی استعمال کر چکا ہوتا ہے، اور اس دوران کمپنی کو نقصان کا سامنا کرنا پڑتا ہے، اسی لیے سکیورٹی ڈیپازٹ کو تحفظ کے طور پر رکھا جاتا ہے۔
اس موقع پر ممبر نیپرا مطہر حسین نے سوال اٹھایا کہ یہ کیسے طے کیا جاتا ہے کہ تمام صارفین ڈیفالٹر ہو سکتے ہیں اور سب کی سکیورٹی گارنٹی رکھنا ضروری ہے؟ اس پر ڈسکوز کے نمائندے نے کوئی واضح جواب نہ دیا۔
نیپرا کی جانب سے حتمی فیصلہ بعد میں متوقع ہے، تاہم صارفین پر اضافی مالی بوجھ ڈالنے کے معاملے پر مزید غور کیا جا رہا ہے۔
