لاہور: پاکستان ہاکی فیڈریشن (پی ایچ ایف) نے دوسری چیف آف آرمی سٹاف انٹر کلب ہاکی چیمپئن شپ 2025 کا اعلان کر دیا ہے جو 20 دسمبر سے شروع ہو گی۔ چیمپئن شپ کی تفصیلات بتانے کے لیے سیکرٹری پی ایچ ایف رانا مجاہد نے نیشنل ہاکی اسٹیڈیم میں پریس کانفرنس کی۔ ان کا کہنا تھا کہ "ہم چیف آف آرمی سٹاف جنرل سید عاصم منیر نشان امتیاز ملٹری کا شکریہ ادا کرتے ہیں جنہوں نے قومی کھیل کی سرپرستی کی۔”
اس چیمپئن شپ میں پاکستان بھر سے 800 کلبز حصہ لیں گے، اور کلبز کی رجسٹریشن 11 دسمبر سے 15 دسمبر تک جاری رہے گی۔ رجسٹریشن کے بعد تین دن کی جانچ پڑتال کی جائے گی جس میں صوبائی ہاکی ایسوسی ایشنز شامل ہوں گی۔
چیمپئن شپ میں مجموعی طور پر چار مراحل ہوں گے۔ پہلے مرحلے میں 20 دسمبر سے پانچ جنوری 2025 تک ڈسٹرکٹ سطح پر کلبز کے درمیان مقابلے ہوں گے، دوسرے مرحلے میں 8 سے 13 جنوری تک ڈویژن اور ریجنل سطح کے مقابلے ہوں گے، تیسرے مرحلے میں 15 سے 22 جنوری تک صوبائی سطح کے مقابلے ہوں گے، اور چوتھے اور آخری مرحلے میں 3 فروری سے قومی سطح کے مقابلے شروع ہوں گے، جن کا فائنل 15 فروری کو کھیلا جائے گا۔
قومی سطح پر پنجاب سے چار، سندھ اور خیبر پختونخوا سے دو دو، بلوچستان، اسلام آباد، آزاد کشمیر اور گلگت بلتستان سے ایک ایک ٹیم کوالیفائی کرے گی۔ تمام قومی سطح کے میچ نیشنل ہاکی اسٹیڈیم لاہور میں کھیلے جائیں گے۔اس چیمپئن شپ کا مقصد نوجوان اور باصلاحیت ہاکی کھلاڑیوں کی تلاش اور انہیں قومی ٹیم کا حصہ بنانا ہے۔ اس موقع پر اولمپئن آصف باجوہ، قومی ٹیم کے ہیڈ کوچ طاہر زمان اور اولمپئن انجم سیعد بھی موجود تھے، جنہوں نے چیمپئن شپ کے انعقاد کی اہمیت پر زور دیا۔
