پاکستانی گلوکار جواد احمد نے اولاد نہ ہونے اور دوسری شادی کے حوالے سے اپنے خیالات کا اظہار کرتے ہوئے کہا ہے کہ معاشرتی دباؤ کے باوجود انہوں نے اس معاملے کو کبھی اپنی زندگی کا مسئلہ نہیں بنایا۔ ان کے مطابق ان کے خاندان کا ماحول ترقی پسند رہا ہے، جس کی وجہ سے انہیں اولاد نہ ہونے پر والدین یا دیگر اہلِ خانہ کی جانب سے کسی دباؤ کا سامنا نہیں کرنا پڑا۔
جواد احمد طویل عرصے سے موسیقی کی دنیا سے وابستہ ہیں۔ ’دوستی‘ اور ’او کہندی اے سیاں میں تیری آں‘ جیسے مقبول گانوں نے انہیں عوام میں نمایاں پہچان دلائی۔ بعد ازاں انہوں نے سیاست کے میدان میں بھی قدم رکھا اور اب انہیں اکثر سیاسی پروگراموں میں حالاتِ حاضرہ پر تجزیہ کرتے ہوئے دیکھا جاتا ہے۔
25 اور 40 ہزار روپے کے پرائز بانڈز کی قرعہ اندازی کا طریقہ کار قومی اسمبلی میں پیش
گلوکار نے اپنی ازدواجی زندگی کے حوالے سے گفتگو کرتے ہوئے بتایا کہ انہیں شادی شدہ زندگی گزارتے ہوئے کئی برس ہو چکے ہیں، تاہم ان کے ہاں اولاد نہیں ہے۔ ان کا کہنا تھا کہ انہوں نے اس صورتِ حال کو کبھی ذاتی مسئلہ نہیں بنایا، تاہم وہ اس حقیقت سے واقف ہیں کہ بعض مرد پہلی شادی سے اولاد نہ ہونے کی صورت میں بچوں کی خواہش پوری کرنے کے لیے دوسری شادی کرلیتے ہیں۔
دوسری شادی کے حوالے سے اپنی رائے کا اظہار کرتے ہوئے جواد احمد نے کہا کہ اگرچہ مردوں کو ایک سے زیادہ شادیاں کرنے کی اجازت دی گئی ہے، لیکن ان کے خیال میں دو خواتین کے درمیان مکمل انصاف کرنا انتہائی مشکل ہے۔ اسی بنیاد پر ان کا مؤقف ہے کہ انسان کو ایک ہی ازدواجی رشتے پر توجہ دینی چاہیے اور اسی تعلق کو پوری ذمہ داری کے ساتھ نبھانا چاہیے۔
جواد احمد کی گفتگو میں خاندانی دباؤ، اولاد کی خواہش اور دوسری شادی سے متعلق معاشرتی رویوں کے بارے میں ان کا ذاتی نقطۂ نظر سامنے آیا ہے۔ ان کے مطابق خاندان کی جانب سے اولاد نہ ہونے کے معاملے پر دباؤ کا سامنا نہ کرنا ان کے لیے اہم رہا، جبکہ دوسری شادی کے حوالے سے ان کی رائے باہمی انصاف اور ایک ازدواجی رشتے سے وابستگی کے تصور پر مبنی ہے۔
