پنجاب میں ایک لاکھ گھروں کو سولر پینل دینے کی منظوری، مریم نواز کا بڑا اعلان
سولر اسکیم فیز 2 میں مستحق گھرانوں کی تعداد 90 ہزار سے بڑھا کر ایک لاکھ کرنے کا فیصلہ، چولستان میں 5 ہزار سولر پینلز کا پائلٹ منصوبہ بھی منظور۔
وزیراعلیٰ پنجاب مریم نواز شریف نے وزیراعلیٰ سولر پینل اسکیم کے دوسرے مرحلے کی منظوری دے دی ہے، جس کے تحت سولر پینل حاصل کرنے والے گھرانوں کی تعداد 90 ہزار سے بڑھا کر ایک لاکھ کرنے کا فیصلہ کیا گیا ہے۔

تفصیلات کے مطابق وزیراعلیٰ مریم نواز شریف نے سولر پینل اسکیم فیز 2 میں مستفید ہونے والے گھرانوں کی تعداد میں اضافے کا حکم دیا ہے۔ اس فیصلے کے تحت مزید گھرانوں کو شمسی توانائی سے فائدہ اٹھانے کا موقع فراہم کیا جائے گا۔
وزیراعلیٰ نے چولستان میں 5 ہزار سولر پینلز کی فراہمی کے پائلٹ پراجیکٹ کی بھی منظوری دے دی ہے۔ اس منصوبے کا مقصد علاقے میں شمسی توانائی کے استعمال کو فروغ دینا ہے۔
دوسری جانب مریم نواز شریف نے صوبے کے تمام بڑے اسپتالوں کے انرجی آڈٹ کا حکم دیتے ہوئے ہدایت کی ہے کہ اسپتالوں میں بجلی کی کھپت اور ضرورت کے مطابق الیکٹرک پینلز نصب کیے جائیں تاکہ توانائی کے استعمال کو بہتر بنایا جا سکے۔
اجلاس میں 3 ہزار ٹن ویسٹ سے توانائی پیدا کرنے کے پائلٹ پراجیکٹ کی بھی اصولی منظوری دی گئی۔ اس منصوبے کے ذریعے کچرے کو توانائی میں تبدیل کرنے کے امکانات پر کام کیا جائے گا۔
ان اقدامات کے تحت پنجاب میں شمسی توانائی کے استعمال میں اضافے، سرکاری اسپتالوں میں توانائی کی بچت اور ویسٹ سے بجلی پیدا کرنے کے منصوبوں پر پیش رفت کی جائے گی



