میر رضا کیس: جے آئی ٹی کو تحقیقات مکمل کرنے کے لیے 10 روز کی مہلت مل گئی

کراچی: میر رضا کیس میں اہم پیش رفت ہوئی ہے، جہاں جوڈیشل مجسٹریٹ شرقی کی عدالت نے مشترکہ تحقیقاتی ٹیم (جے آئی ٹی) کو تفتیش مکمل کرنے کے لیے مزید 10 روز کی مہلت دے دی ہے۔

24 نیوز کے مطابق میر رضا کیس کی سماعت جوڈیشل مجسٹریٹ شرقی کی عدالت میں ہوئی، جہاں عدالت نے جے آئی ٹی کو تحقیقات مکمل کرنے کے لیے 10 دن کا وقت دیتے ہوئے تحقیقاتی اجلاسوں کے منٹس سے بھی آگاہ کرنے کا حکم دیا۔

عدالت نے میر رضا اور احمد بھرردے کی الیکٹرانک ڈیوائسز کی لائیو فرانزک جانچ کی اجازت بھی دے دی۔ اس کے ساتھ تحقیقاتی ٹیم کو فرانزک جانچ کے دوران طے شدہ پروٹوکول پر عمل درآمد یقینی بنانے اور نتائج سے عدالت کو آگاہ کرنے کی ہدایت کی گئی۔

کیس کی تفتیش کے دوران جے آئی ٹی نے گزشتہ روز نارتھ ناظم آباد برانچ سے میر رضا کے پارٹنر کا ذاتی پستول بھی برآمد کیا تھا۔ ذرائع کے مطابق اس کارروائی کے بعد برانچ کا ریکارڈ ضبط کرکے اسے سیل کر دیا گیا، جبکہ برآمد ہونے والا پستول فرانزک تجزیے کے لیے بھجوا دیا گیا ہے۔

دوسری جانب احمد بھرردے کے اہل خانہ نے مؤقف اختیار کیا ہے کہ نارتھ ناظم آباد برانچ 29 جولائی سے بند ہے اور ضبط کیا گیا اسلحہ نجی سیکیورٹی گارڈ کا ہے۔

اہل خانہ کا کہنا ہے کہ وہ تفتیشی عمل میں مکمل تعاون کر رہے ہیں۔

عدالتی احکامات کے بعد اب جے آئی ٹی کو مقررہ 10 روز میں تحقیقات مکمل کرکے پیش رفت سے آگاہ کرنا ہوگا، جبکہ الیکٹرانک ڈیوائسز کی فرانزک جانچ اور برآمد ہونے والے پستول کی رپورٹ بھی کیس کی تفتیش میں اہمیت اختیار کر گئی ہے۔