باکو میں نصر اقبال سردار خان کو کاروباری اور سماجی خدمات سمیت انسانیت کی خدمت کے اعتراف میں بین الاقوامی ایوارڈ سے نواز دیا گیا۔
362 پاکستانی قیدیوں کی رہائی کے لیے 6.7 ملین سعودی ریال کی ادائیگی، 44 بچوں کے دل کے آپریشن، 30 دیہات میں صاف پانی کی فراہمی اور دیگر کاروباری و فلاحی خدمات پر انہیں بین الاقوامی سطح پر پذیرائی حاصل ہوئی ہے۔
قونصلیٹ جنرل آف پاکستان جدہ اور سفارت خانہ پاکستان ریاض گزشتہ برسوں کے دوران تین مرتبہ ان کا نام سول ایوارڈ اور تمغۂ امتیاز کے لیے حکومتِ پاکستان کو بھجوا چکے ہیں۔
کراچی میں آٹے کی قیمتیں بے قابو، چکی کا آٹا 200 روپے کلو ہوگیا
آزاد جموں و کشمیر کے ضلع بھمبر کی تحصیل برنالہ سے تعلق رکھنے والے معروف پاکستانی کاروباری شخصیت، سماجی رہنما اور انسانیت کی خدمت کے لیے سرگرم نصر اقبال سردار خان کو آذربائیجان کے دارالحکومت باکو میں منعقدہ بین الاقوامی تقریب ’انٹرنیشنل اچیورز ایوارڈز 2026، سیزن 4‘ میں کاروباری، قائدانہ اور سماجی خدمات کے اعتراف میں ’انٹرپرینیورشپ ایکسیلینس ایوارڈ 2026‘ سے نوازا گیا۔
اس بین الاقوامی تقریب میں مختلف ممالک سے تعلق رکھنے والی نمایاں کاروباری، سماجی اور دیگر شعبہ ہائے زندگی کی شخصیات نے شرکت کی۔ تقریب کا اہتمام ویسٹ ورلڈ گروپ نے کیا، جس کی بانی نائمہ لاشاری ہیں۔
نصر اقبال سردار خان گزشتہ تقریباً 23 برس سے سعودی عرب کے شہر جدہ میں مقیم ہیں، جہاں انہوں نے تعمیراتی صنعت، کاروباری ترقی، پاکستانی کمیونٹی کی خدمت اور فلاحی سرگرمیوں میں نمایاں کردار ادا کیا ہے۔
**حکومتِ پاکستان کی جانب سے لائف ٹائم اچیومنٹ ایوارڈ**
نصر اقبال سردار خان کو 2025 میں حکومتِ پاکستان کی جانب سے ان کی طویل سماجی، فلاحی اور انسانی خدمات کے اعتراف میں لائف ٹائم اچیومنٹ ایوارڈ سے بھی نوازا جا چکا ہے۔ اس کے علاوہ سعودی عرب اور پاکستان میں مختلف سماجی، کاروباری اور کمیونٹی تنظیمیں انہیں متعدد اعزازات اور تعریفی اسناد دے چکی ہیں۔
**سول ایوارڈ اور تمغۂ امتیاز کے لیے تین مرتبہ نامزدگی**
نصر اقبال سردار خان کی فلاحی، سماجی اور انسانی خدمات کے اعتراف میں قونصلیٹ جنرل آف پاکستان جدہ اور سفارت خانہ پاکستان ریاض گزشتہ برسوں کے دوران مجموعی طور پر تین مرتبہ ان کا نام پاکستان کے اعلیٰ سول اعزازات، بشمول تمغۂ امتیاز، کے لیے حکومتِ پاکستان کو سفارش کے طور پر بھجوا چکے ہیں۔
ان سفارشات میں بالخصوص سعودی عرب میں پاکستانی قیدیوں کی رہائی، ضرورت مند پاکستانیوں کی معاونت، بچوں کے علاج اور دیگر فلاحی خدمات کو اہمیت دی گئی۔
**362 پاکستانی قیدیوں کی رہائی کے لیے 6.7 ملین سعودی ریال کی ادائیگی**
نصر اقبال سردار خان کی انسانی خدمات میں نمایاں کارناموں میں سعودی عرب کی مختلف جیلوں اور حراستی مراکز میں موجود پاکستانی قیدیوں کی رہائی کے لیے ان کی مسلسل جدوجہد شامل ہے۔
وہ ہیلپ دا ہیومینٹی گروپ سعودی عرب کے ذریعے مخیر حضرات اور رضاکاروں کے تعاون سے اب تک 362 پاکستانی قیدیوں کی رہائی میں کردار ادا کر چکے ہیں، جن کے جرمانوں اور قانونی تصفیوں کی مد میں تقریباً 6.7 ملین سعودی ریال ادا کیے جا چکے ہیں۔
ان قیدیوں میں ایسے افراد بھی شامل تھے جو مالی جرمانوں اور دیگر قانونی معاملات کے باعث طویل عرصے سے اپنے اہلِ خانہ سے دور تھے۔ ان کی رہائی سے سینکڑوں خاندانوں میں خوشیاں واپس لوٹیں اور متعدد بچوں کو اپنے والدین سے دوبارہ ملنے کا موقع ملا۔
**44 مستحق بچوں کے دل کے کامیاب آپریشن**
نصر اقبال سردار خان کی فلاحی خدمات کا ایک اہم پہلو پیدائشی امراضِ قلب میں مبتلا مستحق بچوں کا علاج بھی ہے۔
لٹل ہارٹس ہوپ کے ذریعے پاکستان چلڈرن ہارٹ فاؤنڈیشن اور مخیر حضرات کے تعاون سے اب تک 44 مستحق بچوں کے دل کے کامیاب آپریشن کروائے جا چکے ہیں۔
ان بچوں کا تعلق ایسے گھرانوں سے تھا جو مہنگے علاج کے اخراجات برداشت کرنے کی استطاعت نہیں رکھتے تھے۔ اس فلاحی اقدام نے درجنوں بچوں کو نئی زندگی اور ان کے والدین کو امید فراہم کی۔
**آزاد کشمیر کے 30 دیہات میں پینے کے صاف پانی کی فراہمی**
نصر اقبال سردار خان نے اپنے آبائی علاقے یونین کونسل تھب پٹنی، تحصیل برنالہ، ضلع بھمبر، آزاد جموں و کشمیر میں پینے کے صاف پانی کی فراہمی کے لیے ایک بڑا فلاحی منصوبہ بھی شروع کیا۔
تقریباً 14 کلومیٹر طویل واٹر سپلائی منصوبے کے ذریعے 30 کے قریب دیہات کے تقریباً ایک ہزار گھروں تک پانی کی فراہمی کا انتظام کیا گیا۔
ان علاقوں میں پہلے خواتین اور بچے دور دراز مقامات سے سروں پر برتن اٹھا کر پانی لانے پر مجبور تھے۔ اس منصوبے نے مقامی آبادی، بالخصوص خواتین اور بچوں کی روزمرہ مشکلات میں نمایاں کمی لانے میں اہم کردار ادا کیا ہے۔
**تعلیم، صحت اور فلاحی سرگرمیوں میں خدمات**
نصر اقبال سردار خان مختلف فلاحی تنظیموں کے تعاون سے مستحق طلبہ کی تعلیمی معاونت، غریب مریضوں کے علاج، ادویات کی فراہمی، ایمبولینس سروس، ہنرمندی کے فروغ اور ضرورت مند خاندانوں کی مالی مدد کے لیے بھی سرگرم ہیں۔
وہ فاعل الخیر فاؤنڈیشن کے چیئرمین کی حیثیت سے بھی فلاحی منصوبوں کو آگے بڑھا رہے ہیں۔
اس کے علاوہ وہ سعودی عرب میں پاکستانی کمیونٹی کی فلاح، کشمیر کاز اور انسانی حقوق کے لیے بھی مختلف تنظیموں کے پلیٹ فارمز سے خدمات انجام دیتے رہے ہیں، جن میں کشمیر کمیٹی جدہ، پاکستان انٹرنیشنل اوورسیز فورم اور دیگر سماجی تنظیمیں شامل ہیں۔
**سعودی عرب میں بڑے تعمیراتی منصوبوں کی نگرانی**
نصر اقبال سردار خان سعودی عرب کی تعمیراتی صنعت میں بھی ایک تجربہ کار اور نمایاں شخصیت ہیں۔ وہ مدن البناء کنٹریکٹنگ کمپنی، جدہ میں چیف آپریٹنگ آفیسر کی حیثیت سے خدمات انجام دے رہے ہیں۔
اپنے طویل پیشہ ورانہ کیریئر کے دوران انہوں نے سعودی عرب میں متعدد بڑے تعمیراتی اور ترقیاتی منصوبوں کی نگرانی کی ہے۔
ان کے نمایاں منصوبوں میں جدہ کے پرنس ماجد پارک کا تعمیراتی منصوبہ، مختلف یونیورسٹیوں کے بڑے تعمیراتی منصوبے اور قونصلیٹ جنرل آف پاکستان جدہ کی نئی عمارت شامل ہیں۔
قونصلیٹ جنرل آف پاکستان جدہ کی نئی عمارت بھی ان کی نگرانی میں تعمیر کی گئی، جو سعودی عرب میں پاکستانی کمیونٹی کے لیے ایک اہم منصوبہ ہے۔
**مال آف کشمیر کے مالک، پاکستان اور یورپ میں سرمایہ کاری**
نصر اقبال سردار خان پاکستان میں قائم بڑے تجارتی ادارے مال آف کشمیر، برنالہ، آزاد کشمیر کے مالک بھی ہیں۔
یہ ایک وسیع تجارتی مرکز ہے جہاں مختلف شعبوں میں تقریباً 150 افراد کو روزگار کے مواقع فراہم کیے گئے ہیں۔ اس ادارے کے ذریعے علاقے میں جدید کاروباری سہولیات، سرمایہ کاری اور روزگار کے نئے مواقع پیدا ہوئے ہیں۔
اس کے علاوہ وہ یورپی ملک پرتگال میں بھی کاروباری سرمایہ کاری کر رہے ہیں، جہاں لزبن میں قائم 92 آٹو زون کے شراکت دار ہیں اور تعمیرات، رینوویشن اور دیگر کاروباری شعبوں میں ترقی کے منصوبوں پر کام کر رہے ہیں۔
ان کا مقصد کاروباری ترقی کے ساتھ روزگار کے مواقع پیدا کرنا اور اپنی آمدن کا ایک حصہ انسانیت کی خدمت کے لیے وقف کرنا ہے۔
**بین الاقوامی اعزاز رضاکاروں اور مخیر حضرات کے نام**
باکو میں ایوارڈ حاصل کرنے کے بعد نصر اقبال سردار خان نے اس اعزاز کو اپنی ذاتی کامیابی کے بجائے اجتماعی جدوجہد کا نتیجہ قرار دیا۔
انہوں نے اپنا ایوارڈ خصوصی طور پر ہیلپ دا ہیومینٹی گروپ، لٹل ہارٹس ہوپ کے تمام اراکین، رضاکاروں، مخیر حضرات اور ان تمام دوستوں کے نام کیا جن کے تعاون سے مستحق انسانوں کی مدد ممکن ہو رہی ہے۔
ان کا کہنا تھا کہ انسانیت کی خدمت کے لیے بڑے عہدوں یا وسائل سے زیادہ خلوصِ نیت، ہمدردی اور عملی کردار کی ضرورت ہوتی ہے۔ اگر ہر صاحبِ استطاعت شخص اپنی ذمہ داری محسوس کرے تو معاشرے کے بے شمار مسائل حل کیے جا سکتے ہیں۔
انہوں نے اپنی کامیابیوں کو اللہ تعالیٰ کا فضل، والدین کی دعاؤں، اہلِ خانہ کے تعاون اور دوستوں کی محبت کا نتیجہ قرار دیا۔
