ملک بھر میں بجلی کی بڑھتی ہوئی قیمتوں نے غریب اور متوسط طبقے کے لیے مشکلات بڑھا دی ہیں۔ مستقبل قریب میں بجلی کی قیمتوں میں کمی کے امکانات بھی نظر نہیں آ رہے۔
تقریباً ہر پاکستانی بجلی کے بڑھتے ہوئے نرخوں سے پریشان ہے۔ اگر آپ گھر کا بجلی کا بل کم کرنا چاہتے ہیں تو چند باتوں پر عمل کیا جا سکتا ہے۔
گرمی کی شدت کے باعث گھروں اور دفاتر میں ایئر کنڈیشنر کا استعمال عام ہو گیا ہے۔ اے سی جتنے زیادہ گھنٹے چلے گا بجلی کی کھپت بھی اتنی بڑھے گی جس کا اثر مہینے کے آخر میں بل پر پڑے گا۔
شدید گرمی میں گھر کو ٹھنڈا رکھنے کے ساتھ اے سی کو ہر وقت پوری طاقت پر چلانے سے بچا جا سکتا ہے۔ اے سی کا درجہ حرارت چند ڈگری بڑھانے سے توانائی کی کھپت کم ہوتی ہے۔ بہت زیادہ درجہ حرارت مقرر کرنے سے گھر کا ماحول غیر آرام دہ ہو سکتا ہے۔
ماہرین کے مطابق بجلی کا بل کم کرنے کے لیے اے سی کا درجہ حرارت 26 ڈگری سینٹی گریڈ یا اس سے زیادہ رکھیں۔ پرانے بلبوں کی جگہ ایل ای ڈی لائٹس استعمال کریں اور استعمال میں نہ ہونے والے الیکٹرانک آلات کے پلگ سوئچ سے نکال دیں۔
بجلی کا بل اے سی کی کارکردگی، گھر کے رقبے اور بیرونی درجہ حرارت سمیت کئی عوامل پر منحصر ہوتا ہے۔ ماہرین کا کہنا ہے کہ اے سی کا درجہ حرارت ہر ایک ڈگری بڑھانے سے توانائی کے اخراجات میں تقریباً 1 سے 3 فیصد تک بچت ہو سکتی ہے۔ یعنی اے سی کو 22 ڈگری کے بجائے 26 ڈگری پر چلانے سے توانائی اور اخراجات دونوں کم ہو سکتے ہیں۔
انتہائی گرم دنوں میں اے سی کو مکمل بند کرنا ہمیشہ مؤثر نہیں ہوتا۔ گھر کا درجہ حرارت بہت زیادہ بڑھ جائے تو واپس آ کر اسے ٹھنڈا کرنے کے لیے اے سی کو زیادہ دیر چلانا پڑ سکتا ہے۔ ایسے میں اے سی بند کرنے کے بجائے اس کا درجہ حرارت بڑھا دینا بہتر ہے۔
نمی کی وجہ سے ایک ہی درجہ حرارت بھی زیادہ گرم اور گھٹن والا محسوس ہو سکتا ہے۔ اے سی کو بہت کم درجہ حرارت پر چلانے کے بجائے اسے کچھ زیادہ پر مقرر کرنے سے بجلی کی کھپت کم کی جا سکتی ہے۔
عام طور پر 24 سے 26 ڈگری سینٹی گریڈ وہ ترتیب ہے جو آرام اور توانائی کی بچت کے درمیان توازن قائم کرتی ہے۔
