وزیراعلیٰ بلوچستان میر سرفراز بگٹی کی سمر انٹرن شپ پروگرام 2026 کے طلبہ سے خصوصی نشست ہوئی، جس میں پاکستان بھر کے 21 اسٹیشنز سے 6,150 سے زائد طلبہ و طالبات نے شرکت کی۔
میر سرفراز بگٹی نے بلوچستان میں دہشت گردی، فتنہ الہندوستان، ریاست مخالف پروپیگنڈا، افغانستان، سوشل میڈیا اور گورننس کے حوالے سے اظہار خیال کیا۔
حکومت نوجوانوں کو معیاری تعلیم کے ذریعے بااختیار بنانے کیلئے پرعزم ہے،صدر،وزیراعظم
وزیراعلیٰ بلوچستان میر سرفراز احمد بگٹی نے طلبہ سے خطاب کرتے ہوئے کہا کہ بلوچستان میں فتنہ الہندوستان اور دیگر دہشت گرد عناصر تشدد کے ذریعے بدامنی پھیلانے کی کوشش کر رہے ہیں، جبکہ علیحدگی پسند بیانیے کے ذریعے پاکستان کو کمزور کرنے کے عزائم کبھی کامیاب نہیں ہوں گے۔
ان کا کہنا تھا کہ انسانی حقوق، بالخصوص لاپتہ افراد کے عنوانات کو ریاست مخالف بیانیے اور دہشت گردی کے فروغ کے لیے استعمال کیا جا رہا ہے، جبکہ دہشت گردی کے خلاف حکومت بلوچستان اور سکیورٹی فورسز مربوط حکمت عملی کے تحت کام کر رہی ہیں۔
سرفراز بگٹی نے کہا کہ افغانستان میں موجود پاکستان مخالف عناصر کے حوالے سے افغان عبوری حکومت کو اپنے عالمی وعدوں کی پاسداری کرنا ہوگی۔ مقبول بیانیہ ہمیشہ حق کا بیانیہ نہیں ہوتا، پاکستان کے ساتھ کھڑا ہونا ہی حق کا ساتھ دینا ہے۔ بلوچستان کا مستقبل پاکستان کے ساتھ وابستہ ہے، بلوچ عوام کی ترقی، خوشحالی اور بقا پاکستان کی مضبوطی میں ہے۔
