کراچی: وفاقی حکومت کے ترجمان برائے سندھ راجہ خلیق انصاری نے کہا ہے کہ گرین لائن منصوبے پر کام جلد دوبارہ شروع کیا جائے گا، جس سے شہریوں کو بہتر سفری سہولیات میسر آئیں گی۔
راجہ خلیق انصاری نے بتایا کہ وزیراعظم ہاؤس میں ہونے والی میٹنگ میں گرین لائن منصوبے سے متعلق تمام امور پر تفصیلی بات چیت ہوئی ہے، جبکہ بلدیاتی حکومت کی جانب سے جن ادھورے کاموں کی نشاندہی کی گئی ہے، انہیں جلد مکمل کیا جائے گا۔
ٹماٹروں کی قیمت میں ہوشربا اضافہ شہری پریشان
انہوں نے کہا کہ منصوبے میں ایک ماہ کی تاخیر کے باعث اب یہ ستمبر 2026 تک مکمل ہوگا۔ منصوبے کے تحت کیپری سنیما، پلازہ اور جامع کلاتھ کے قریب ایک نیا اسٹیشن بنایا جائے گا، جبکہ گرین لائن کا اختتام بھی جامع کلاتھ کے علاقے میں ہوگا۔
ترجمان کے مطابق میئر کراچی کا خیال تھا کہ منصوبے کے لیے این او سی حاصل نہیں کیا گیا، تاہم دراصل این او سی 2017 میں لی گئی تھی اور اس کی کوئی میعاد مقرر نہیں تھی، اس لیے وہی این او سی اب بھی قابلِ عمل ہے۔
راجہ خلیق انصاری نے مزید بتایا کہ 31 اکتوبر کو کراچی کینٹ اسٹیشن پر جدید طرز کے “اسٹیٹ آف دی آرٹ” اسٹیشن کا افتتاح کیا جائے گا، جہاں آنے والوں کو ایسا محسوس ہوگا جیسے وہ ائیرپورٹ پر موجود ہیں۔
انہوں نے کہا کہ وفاقی حکومت کراچی میں جاری ترقیاتی منصوبوں میں بھرپور تعاون کے لیے تیار ہے، جبکہ لیاری ایکسپریس وے پر معمول کی مینٹی ننس جاری ہے اور یہ منصوبہ اپنی موجودہ حالت میں کام کرتا رہے گا۔
