کوئٹہ (مانیٹرنگ ڈیسک) پاکستان مسلم لیگ (ن) کے قائد میاں نواز شریف نے کہاکہ ہم نے اپنے دورمیں چار سو چھوٹے چھوٹے ڈیمز بنائے تاکہ عوام کو پانی ملے،شہبازشریف کے بنائے دانش سکولوں میں بچوں کو داخلہ دیا ،بلوچستان کے بچوں کو تعلیم کی بہترین سہولیات دینا چاہتے ہیں،سوالاکھ ایکڑ سیراب کرنے والی کچھی کنال 50 ارب میں ہم نے بنائی ۔بدھ کوپارٹی صدر میاں شہباز شریف کے ہمراہ ن لیگ بلوچستان کے اجلاس سے خطاب کرتے ہوئے میاں نواز شریف نے کہاکہ باتیں کرنے والے بہت آئے، عملی طورپر کچھ نہیں کیا،صرف مسلم لیگ (ن) نے کوئٹہ، گوادر، ژوب اور لورالائی کے بارے میں سوچا،گوادر کو سندھ کے ساتھ ملایا، کوسٹل ہائی وے بنائی ، کوئٹہ کو ڈیرہ اسماعیل خان کے ذریعے اسلام آباد سے ملا رہے ہیں ۔
انہوں نے کہاکہ 2018 میں منصوبہ مکمل ہونا تھا ، یہ منصوبہ کیوں مکمل نہ ہوا ،یہ نقصان عوام کا ہوا، بلوچستان کا ہوا ،پاکستان کو ہوا،ڈیڑھ دن میں گوادر سے کوئٹہ لوگ پہنچتے تھے، ہم نے اُن کی یہ تکلیف ختم کی،گوادر کوئٹہ شاہراہ کی تعمیر سے اب آپ ناشتہ گوادر اور دوپہر کا کھانا کوئٹہ میں کھا سکتے ہیں،کچھ فرق تو ہے باتیں کرنے اور عمل کرنے والوں میں ، کہاں گئی وہ تبدیلی؟ عوام کو پوچھنا چاہیے، کون کس نے کیا کیا ؟ بچوں کو بتانا چاہیے، ہمارا ایجنڈا صرف سڑکوں، تعلیم، صحت تک محدود نہیں ہوگا ،پاکستان کا سب سے بہترین ہوائی اڈہ گوادر میں مکمل ہونے والا ہے،ہم نے گوادر کا نام اُس وقت لیا جب 1990 میں میں وزیراعظم بنا تھا،عوام کو بجلی کے مہنگے بلوں سے آزاد کرنا چاہتے ہیں، سولر پینلز کی سکیم لائیں گے، گھریلو، کمرشل اور زرعی صارفین کو سولر پینلز سے مہنگی بجلی سے نجات دلائیں گے، بغض اور حسد ، گندی زبان اور نفرت نے معاشرے کو گندا کیا۔پارٹی ورکروں سے ملتا رہوں گا،قوم اچھے لوگوں کا ساتھ دے۔
مزید پڑھیں: ’بہتر ہے پنجاب پر فوکس کریں‘، بلاول نے نواز شریف کے دورہ بلوچستان کو (ن) لیگ کی کمزوری قرار دیدیا
میاں نواز شریف نے کہاکہ ہمیں اپنے لئے اقتدار نہیں چاہیے، ہمیں خوش حال پاکستان چاہیے ، ہم ایسا پاکستان چاہتے ہیں جہاں عوام کی زندگی آسان ہو،ہم اقتدار میں آتے ہیں تو اللہ کے فضل سے عوام کی زندگی آسان بناتے ہیں ۔
