وفاقی وزیر اطلاعات و نشریات مریم اورنگزیب نے کہا ہے کہ وزیراعظم شہباز شریف کی ہدایت پر صحافیوں کے لیے ’ہیلتھ انشورنس‘ کارڈ کے لیے رجسٹریشن کا آغاز کردیا گیا ہے اور ہیلتھ کارڈ کا اجرا 7 اگست کو کیا جائے گا۔
اسلام آباد۔24جولائی (اے پی پی): وفاقی وزیر اطلاعات و نشریات مریم اورنگزیب نے میڈیا ورکرز اور صحافیوں کے لئے ہیلتھ انشورنس فارم کا آن لائن اجراءکر دیا۔ پیر کو یہاں پی ٹی وی ہیڈ کوارٹرز میں وفاقی وزیر اطلاعات نے صحافیوں کیلئے آن لائن رجسٹریشن فارم جاری کیا جو وزارت اطلاعات اور پریس انفارمیشن ڈیپارٹمنٹ کی ویب سائیٹس پر موجود ہے، صحافی آن لائن ہیلتھ انشورنس فارم کے ذریعے اپنی رجسٹریشن کر سکیں گے۔
اس موقع پر پرنسپل انفارمیشن آفیسر مبشر حسن سمیت صحافی حضرات بھی موجود تھے۔ صحافیوں کو صحت کی یہ سہولت پرائم منسٹر ہیلتھ انشورنس اسکیم برائے میڈیا ورکرز اینڈ جرنلسٹس 2023ءکے تحت دی جا رہی ہے جس کے لئے حکومت نے وفاقی بجٹ میں ایک ارب روپے کی خطیر رقم مختص کی ہے۔ اس اسکیم سے ملک بھر کے صحافی مستفید ہو سکتے ہیں، اس کے لئے پریس کلب کا رکن ہونا لازمی نہیں ہے۔ آن لائن رجسٹریشن فارم کے اجراءکو ممکن بنانے پر وفاقی وزیر اطلاعات نے سیکریٹری اطلاعات سہیل علی خان، پی آئی او مبشر حسن اور وزارت اطلاعات کی ٹیم کو مبارکباد دی۔
