عالمی منڈی میں تیل کی قیمتوں میں اضافہ، برینٹ خام تیل 106 ڈالر فی بیرل سے تجاوز کر گیا
حوثیوں کی جانب سے سعودی آرامکو کے ہیڈکوارٹر پر حملے اور ایران کی جانب سے مال بردار بحری جہازوں کو نشانہ بنانے کی نئی حکمت عملی اپنانے کے اعلان کے بعد عالمی منڈی میں تیل کی قیمتوں میں اضافے کا سلسلہ جاری ہے۔
غیر ملکی میڈیا رپورٹس کے مطابق برینٹ خام تیل کے مستقبل کے سودوں کی قیمت میں 37 سینٹ، یعنی 0.35 فیصد اضافہ ریکارڈ کیا گیا، جس کے بعد قیمت 106.06 ڈالر فی بیرل تک پہنچ گئی۔
طیارے کے اندر کھٹملوں کی دریافت نے اسے واپس اترنے پر مجبور کر دیا
اسی طرح امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت میں 95 سینٹ، یعنی 1.01 فیصد اضافہ ہوا، جس کے بعد یہ 95.09 ڈالر فی بیرل ہوگئی۔ یہ گزشتہ تین ہفتوں کے دوران اس کی بلند ترین سطح ہے۔
پرائس فیوچرز گروپ کے سینئر تجزیہ کار فل فلن کے مطابق آبنائے ہرمز سے گزرنے والے بحری جہازوں پر حملوں اور سعودی عرب کے اتحادی حوثیوں اور ایران کے درمیان حملوں کے تبادلے نے تیل کی قیمتوں میں اضافے کے خدشات کو بڑھا دیا ہے۔
ایرانی حکام نے تجارتی بحری جہازوں کو نشانہ بنانے کی نئی حکمت عملی کی تفصیلات بتانے سے گریز کیا، تاہم ایک ایرانی عہدیدار کے مطابق تہران نے تقریباً 10 روز قبل حملوں کے لیے مختلف حکمت عملی اختیار کرنا شروع کی تھی۔
دوسری جانب ستمبر میں ایران کے علاوہ خلیجی ممالک سے تیل کی ترسیل میں نمایاں اضافہ دیکھا گیا، جو جنگ سے پہلے کی سطح کے 81 فیصد سے بھی تجاوز کر گئی۔ اس اضافے میں سعودی عرب کی تیل برآمدات کی بحالی نے اہم کردار ادا کیا۔
ادھر امریکی ناکہ بندی کے باعث ایران کی تیل برآمدات صفر تک پہنچ گئیں۔
