اسٹیٹ بینک آف پاکستان نے 25 ہزار اور 40 ہزار روپے کے پرائز بانڈز کی قرعہ اندازی کے طریقہ کار کی تفصیلات قومی اسمبلی میں پیش کر دی ہیں، جن کے مطابق قرعہ اندازی میں خصوصی بچوں کو شامل کیا جاتا ہے، جبکہ کامیاب نمبروں کا اعلان اور اندراج بھی یہی بچے کرتے ہیں۔
قومی اسمبلی کے اجلاس کے دوران وقفہ سوالات میں اسٹیٹ بینک نے بتایا کہ پرائز بانڈز کی قرعہ اندازی کے عمل کی نگرانی سات رکنی کمیٹی کرتی ہے، جس کا مقصد پورے عمل میں شفافیت برقرار رکھنا ہے۔ مرکزی بینک کے مطابق قرعہ اندازی کے موجودہ طریقہ کار پر عوام کا اعتماد برقرار ہے اور اس حوالے سے کوئی شکایت موصول نہیں ہوئی۔
ونڈوز پر واٹس ایپ ویب استعمال کرنے والے صارفین کے لیے ہائی الرٹ جاری
اسٹیٹ بینک کی جانب سے پیش کی گئی تفصیلات میں خصوصی بچوں کی شرکت کو قرعہ اندازی کے عمل کا ایک نمایاں پہلو قرار دیا گیا۔ تاہم، طریقہ کار کی مکمل تکنیکی تفصیلات اور نگرانی کے انتظامات سے متعلق مزید معلومات سرکاری جواب میں فراہم کی جا سکتی ہیں۔
دوسری جانب قومی اسمبلی کے اجلاس میں وزارت تجارت نے مالی سال 2025-26 کے دوران درآمد کی گئی چینی کی مقدار، اس پر آنے والے اخراجات، فروخت اور باقی ماندہ ذخیرے کی تفصیلات بھی پیش کر دیں۔
وزارت تجارت کے تحریری جواب کے مطابق 31 اگست 2026 تک درآمد کی گئی چینی پر 54 ارب 15 کروڑ 65 لاکھ روپے سے زائد اخراجات آئے۔
وزارت تجارت نے بتایا کہ مذکورہ مدت کے دوران مجموعی طور پر 3 لاکھ 6 ہزار 373 میٹرک ٹن چینی درآمد کی گئی، جس کی عالمی منڈی میں قیمت 575.56 امریکی ڈالر فی میٹرک ٹن تھی۔ اس کے علاوہ چینی کی درآمد پر عائد 20 فیصد کسٹمز ڈیوٹی بھی ختم کر دی گئی تھی۔
وزارت نے اپنے جواب میں واضح کیا کہ چینی درآمد کرنے کا فیصلہ وزارت قومی غذائی تحفظ و تحقیق نے کیا تھا، جبکہ اس معاملے میں ٹریڈنگ کارپوریشن آف پاکستان (ٹی سی پی) کا فیصلہ سازی میں کوئی کردار نہیں تھا۔
وزارت تجارت کے مطابق درآمد کی گئی چینی میں سے ایک لاکھ 98 ہزار 668 میٹرک ٹن چینی 168 روپے 24 پیسے فی کلوگرام کے حساب سے فروخت کی جا چکی ہے۔
وزارت کے تحریری جواب میں مزید بتایا گیا کہ باقی ماندہ ایک لاکھ 8 ہزار 69 میٹرک ٹن چینی ٹی سی پی کے گوداموں میں موجود ہے، جبکہ اس ذخیرے کو برآمد کرنے کے لیے تاحال کوئی ٹینڈر جاری نہیں کیا گیا۔
