پاکستان کرکٹ بورڈ (پی سی بی) نے جنوری کے آخر میں آسٹریلیا کے دورہ پاکستان اور تین ٹی ٹوئنٹی میچز پر مشتمل سیریز کے شیڈول کی باضابطہ تصدیق کر دی ہے۔ اس سیریز کے تمام میچز لاہور کے قذافی اسٹیڈیم میں کھیلے جائیں گے، جس کا آغاز 29 جنوری سے ہوگا۔ آسٹریلوی ٹی ٹوئنٹی اسکواڈ بدھ 28 جنوری کو لاہور پہنچے گا، جبکہ سیریز کے بقیہ دو میچز 31 جنوری اور یکم فروری کو منعقد ہوں گے۔
متحدہ عرب امارات میں پاکستانیوں کو امیگریشن کلیئرنس کے حوالے سے بڑی خوشخبری مل گئی
شیڈول کے مطابق تینوں میچز میں ٹاس پاکستانی وقت کے مطابق شام 5:30 بجے ہوگا اور پہلی گیند شام 6 بجے کرائی جائے گی۔ یہ سیریز آئندہ ماہ ہونے والے آئی سی سی مینز ٹی ٹوئنٹی ورلڈ کپ 2026 سے قبل دونوں ٹیموں کی تیاریوں کے لیے انتہائی اہم قرار دی جا رہی ہے، جہاں پاکستان ورلڈ کپ کے گروپ اے اور آسٹریلیا گروپ بی کا حصہ ہے۔
یہ مارچ 2022 کے بعد سے آسٹریلیا کا پاکستان کا تیسرا دورہ ہوگا۔ اس سے قبل آسٹریلیا نے 2022 میں ٹیسٹ، ون ڈے اور ٹی ٹوئنٹی سیریز کے علاوہ آئی سی سی چیمپئنز ٹرافی 2025 کے تین میچز بھی پاکستان میں کھیلے تھے۔ قذافی اسٹیڈیم میں کھیلے گئے آخری واحد ٹی ٹوئنٹی میچ میں آسٹریلیا نے پاکستان کو 3 وکٹوں سے شکست دی تھی۔
چیف آپریٹنگ آفیسر پی سی بی سید سمیر احمد سید نے اپنے بیان میں کہا کہ ہم آسٹریلیا کی میزبانی کے لیے پُرجوش ہیں اور یہ سیریز شائقینِ کرکٹ کے لیے سال کا شاندار آغاز ثابت ہوگی۔ انہوں نے مزید کہا کہ 2022 کے بعد سے آسٹریلوی ٹیم یہاں مختلف فارمیٹس کے متعدد میچز کھیل چکی ہے، اس لیے قذافی اسٹیڈیم کا میدان اب ان کے لیے کافی مانوس ہو چکا ہے۔ سیریز کا پہلا میچ جمعرات، دوسرا ہفتہ اور تیسرا اتوار کو کھیلا جائے گا۔
