Gas Leakage Web ad 1

امریکا، ایران تنازع کا حل جلد نکلنے کی امید ہے، نائب وزیر اعظم اسحاق ڈارکا یورو نیوز کو انٹرویو

0

نائب وزیراعظم اور وزیر خارجہ محمد اسحاق ڈار نے امید ظاہر کی ہے کہ امریکا اور ایران کے درمیان جاری تنازع کا جلد حل نکل آئے گا۔ انہوں نے کہا کہ پاکستان دونوں ممالک کے درمیان کشیدگی کم کرنے اور مذاکرات کے ذریعے مسئلے کے حل کے لیے کوششیں جاری رکھے ہوئے ہے۔

Gas Leakage Web ad 2

عالمی نشریاتی ادارے یورو نیوز کو خصوصی انٹرویو دیتے ہوئے اسحاق ڈار نے کہا کہ پاکستان کثیرالجہتی سفارتکاری پر یقین رکھتا ہے اور تمام ممالک کی خودمختاری، علاقائی سالمیت اور مساوی حیثیت کا احترام کرتا ہے۔ ان کے مطابق بلاک سیاست اور یک طرفہ اقدامات کامیاب نہیں ہوسکتے، اس لیے عالمی سطح پر کثیرالجہتی نظام کو مضبوط بنانے کے لیے مزید کوششیں کرنا ہوں گی۔

امریکا اور ایران کے درمیان کشیدگی کم کرنے میں پاکستان کے کردار سے متعلق سوال پر اسحاق ڈار نے کہا کہ جنگ کے پہلے روز پاکستان نے اسرائیلی حملے کی مذمت کی اور ایران سے تحمل کا مظاہرہ کرنے کی اپیل کی تھی۔ انہوں نے بتایا کہ ایران کو مشرق وسطیٰ اور خلیجی ممالک کو حملوں کا نشانہ نہ بنانے کا پیغام بھی دیا گیا تھا۔

نائب وزیراعظم کے مطابق کئی دہائیوں بعد امریکا اور ایران کے درمیان براہ راست مذاکرات میں پاکستان کی شرکت ممکن ہوئی۔ 10 اور 11 اپریل کو ہونے والے مذاکرات تقریباً 21 گھنٹے جاری رہے۔ انہوں نے کہا کہ مذاکرات کے دوران متعدد نکات پر پیش رفت ہوئی، تاہم دونوں فریقین کے اپنے اپنے مؤقف اور ترجیحات کے باعث بات چیت آگے نہ بڑھ سکی۔ پاکستان نے اپنی کوششیں جاری رکھیں اور بعد میں اسلام آباد مفاہمت کی یادداشت پر اتفاق ہوا۔

اسحاق ڈار نے بتایا کہ پاکستان نے چین کے ساتھ مل کر مشرق وسطیٰ میں امن کے لیے پانچ نکاتی اقدام بھی پیش کیا۔ پاکستان، سعودی عرب اور دیگر ممالک نے کشیدگی کم کرنے اور تنازع کے حل کے لیے کوششیں کیں۔ برطانیہ، فرانس اور جرمنی سمیت یورپی ممالک کے ساتھ بھی رابطے جاری رہے تاکہ دونوں فریقین کو مذاکرات اور سفارتکاری کے ذریعے مسئلے کے حل پر آمادہ کیا جاسکے۔
ہانیہ عامر کی کرن اوجلا کے گانے پر مستیاں، دلچسپ ویڈیو سوشل میڈیا پر وائرل
انہوں نے کہا کہ جنگ کے باعث توانائی کی فراہمی متاثر ہوئی اور قیمتوں میں اضافہ ہوا، جس سے پاکستان سمیت دنیا بھر کے عوام مشکلات کا سامنا کر رہے ہیں۔ پاکستان میں حکومت کم آمدنی والے طبقات کو پیٹرولیم اور توانائی کی قیمتوں میں اضافے سے ریلیف دینے کے لیے سبسڈی فراہم کر رہی ہے، تاہم اس کی بھی ایک حد ہے۔

نائب وزیراعظم نے کہا کہ خطے میں پائیدار امن کے لیے نیا سیکیورٹی نظام تشکیل دینے کی ضرورت ہے۔ موجودہ حالات اور عالمی معیشت پر جنگ کے اثرات اس بات کا تقاضا کرتے ہیں کہ تمام ممالک مشترکہ طور پر امن و استحکام کے لیے آگے بڑھیں۔

پاکستان امریکا اور چین کے ساتھ بیک وقت تعلقات برقرار رکھ سکتا ہے، اسحاق ڈار

اسحاق ڈار نے کہا کہ پاکستان امریکا اور چین کے ساتھ بیک وقت تعلقات برقرار رکھ سکتا ہے اور دونوں ممالک کے ساتھ شراکت داری ایک دوسرے سے متصادم نہیں۔ پاکستان میں معاشی ترقی کی بڑی صلاحیت موجود ہے، تاہم اس کے لیے معاشی پالیسیوں میں تسلسل اور اصلاحات ضروری ہیں۔

انہوں نے کہا کہ پاکستان اور امریکا کے تعلقات میں ماضی میں اتار چڑھاؤ آتے رہے ہیں، تاہم موجودہ حکومت امریکا کے ساتھ فعال روابط رکھتی ہے۔ پاکستان امریکا کے ساتھ اقتصادی شراکت داری کو اہمیت دیتا ہے، جبکہ چین کے ساتھ اس کی 75 سالہ شراکت داری مختلف آزمائشوں کے باوجود برقرار رہی ہے۔

اسحاق ڈار نے کہا کہ پاکستان امریکا اور چین کے ساتھ اپنے تعلقات کو ایک دوسرے سے الگ دیکھتا ہے اور دونوں ممالک کے ساتھ تعاون جاری رکھ سکتا ہے۔ دنیا کو امن اور معاشی ترقی کے لیے مل کر کام کرنے کی ضرورت ہے، جبکہ اقوام متحدہ، عالمی بینک اور عالمی مالیاتی فنڈ سمیت عالمی اداروں میں اصلاحات بھی ضروری ہیں۔

انہوں نے کہا کہ معاشی سفارتکاری پاکستان کی خارجہ پالیسی کا اہم حصہ ہے۔ پاکستان کو عالمی سطح پر اپنے معاشی مفادات کے فروغ، سرمایہ کاری کے حصول اور اقتصادی تعاون بڑھانے کے لیے کوششیں کرنا ہوں گی۔

پاکستان کی معاشی صلاحیت سے متعلق سوال پر اسحاق ڈار نے کہا کہ ملک میں معدنی وسائل اور سرمایہ کاری کے وسیع امکانات موجود ہیں۔ انہوں نے پاکستان منرلز انویسٹمنٹ فورم کے تیسرے اجلاس کا ذکر کرتے ہوئے بتایا کہ اس میں 16 ممالک نے شرکت کی۔ ان کے مطابق پاکستان کے معدنی وسائل کی مجموعی صلاحیت تقریباً 130 ارب ڈالر ہے، جبکہ نایاب معدنیات کے امکانات 6 سے 10 کھرب ڈالر تک ہوسکتے ہیں۔

نائب وزیراعظم نے پاکستان کے قرضوں کے تناسب کا حوالہ دیتے ہوئے کہا کہ ملک کی معیشت میں پائیداری کی صلاحیت موجود ہے۔ انہوں نے امریکا، برطانیہ اور جاپان کے قرضوں کے تناسب کا بھی ذکر کیا اور کہا کہ پاکستان کو اپنی معاشی صلاحیت بروئے کار لانے کی ضرورت ہے۔

اسحاق ڈار نے کہا کہ پاکستان کو ماضی میں متعدد معاشی بحرانوں کا سامنا کرنا پڑا، تاہم 2013 سے 2017 کے دوران معاشی اشاریوں میں بہتری آئی اور شرح نمو 6.3 فیصد تک پہنچ گئی، جبکہ مہنگائی 3.2 فیصد اور پالیسی ریٹ 5.25 فیصد رہا۔

انہوں نے معاشی مشکلات کی ایک بڑی وجہ پالیسیوں میں عدم تسلسل کو قرار دیتے ہوئے کہا کہ پاکستان میں چارٹر آف اکانومی کی ضرورت ہے تاکہ حکومتوں کی تبدیلی کے باوجود معاشی پالیسیوں کو برقرار رکھا جاسکے۔ ان کے مطابق یہ اصلاحات عالمی سرمایہ کاروں کے لیے بھی ایک واضح پیغام ہوں گی۔

چین کے ساتھ اقتصادی تعاون کا نیا مرحلہ

اسحاق ڈار نے کہا کہ چین پاکستان اقتصادی راہداری کے پہلے مرحلے کے تحت پاکستان میں تقریباً 25 ارب ڈالر کی سرمایہ کاری ہوئی۔ اب دونوں ممالک سی پیک کے دوسرے مرحلے، سی پیک 2.0، میں داخل ہوچکے ہیں، جس کے تحت اقتصادی تعاون کو نئے شعبوں تک وسعت دی جائے گی۔

انہوں نے بتایا کہ نئے مرحلے میں ٹیکنالوجی، مصنوعی ذہانت، زراعت اور روزگار کے مواقع پیدا کرنے پر توجہ دی جائے گی۔ ان کے مطابق یہ تعاون پاکستان کی اقتصادی تاریخ میں ایک نئے باب کا آغاز ہوسکتا ہے۔

افغانستان سے تعلقات اور دہشتگردی کا معاملہ

اسحاق ڈار نے کہا کہ پاکستان سے زیادہ کوئی ملک افغانستان کو مستحکم، معاشی طور پر مضبوط اور خوشحال دیکھنا نہیں چاہتا۔ انہوں نے بتایا کہ پاکستان نے گزشتہ سال افغانستان کے متعدد دورے کیے اور افغان قیادت سے تجارت، معیشت، مہاجرین اور سیاسی معاملات پر بات چیت کی۔

نائب وزیراعظم کے مطابق پاکستان کا افغانستان سے بنیادی مطالبہ یہی ہے کہ افغان سرزمین کسی بھی ملک، بالخصوص پاکستان کے خلاف دہشتگردی کے لیے استعمال نہ ہونے دی جائے۔ انہوں نے کہا کہ پاکستان نے دہشتگردی سے متعلق شواہد عالمی اداروں کے ساتھ بھی شیئر کیے ہیں اور افغان سرزمین سے سرگرم دہشتگرد گروہوں کے خلاف کارروائی کا مطالبہ کیا ہے۔

اسحاق ڈار نے کہا کہ دونوں ممالک کے درمیان اعتماد کی بحالی کے لیے زبانی یقین دہانیوں کے بجائے قابل تصدیق عملی اقدامات ضروری ہیں۔ ان کے مطابق پاکستان دہشتگردی کے خلاف جنگ میں ایک لاکھ سے زائد انسانی جانیں اور تقریباً 150 ارب ڈالر کا معاشی نقصان برداشت کرچکا ہے۔

پاکستان اور بھارت کے مذاکرات

پاکستان اور بھارت کے درمیان مذاکرات کی بحالی سے متعلق سوال پر اسحاق ڈار نے کہا کہ اس کا انحصار بھارت پر ہے۔ انہوں نے 5 اگست 2019 کے بھارتی اقدامات کا حوالہ دیتے ہوئے کہا کہ پاکستان ان اقدامات کو مسترد کرتا ہے اور مسئلہ کشمیر کے حل کے لیے اقوام متحدہ کی قراردادوں اور کشمیری عوام کے حق خودارادیت کی حمایت کرتا ہے۔

انہوں نے کہا کہ خطے میں پائیدار امن کے لیے تنازعات کو مذاکرات اور سفارتکاری کے ذریعے حل کرنا ضروری ہے۔

سندھ طاس معاہدہ اور پاکستان کے آبی حقوق

اسحاق ڈار نے سندھ طاس معاہدے کے حوالے سے کہا کہ پاکستان اس معاہدے میں کسی یک طرفہ تبدیلی کو قبول نہیں کرسکتا۔ ان کے مطابق معاہدے میں تنازعات کے حل کے لیے باقاعدہ طریقہ کار موجود ہے اور متعلقہ عالمی ثالثی ادارے نے بھی معاہدے کی حیثیت برقرار رہنے سے متعلق فیصلہ دیا ہے۔

انہوں نے کہا کہ پاکستان کی تقریباً 26 کروڑ آبادی کی روزی روٹی، زراعت اور غذائی تحفظ کا انحصار پانی پر ہے، اس لیے پاکستان اپنے آبی حقوق سے دستبردار نہیں ہوسکتا۔ اسحاق ڈار کے مطابق پانی کو سیاسی دباؤ کے لیے استعمال کرنا مناسب نہیں اور معاہدے کی پاسداری دونوں ممالک کے مفاد میں ہے۔

sui northern 2
Leave A Reply

Your email address will not be published.