وفاقی وزیر داخلہ سینیٹر محسن نقوی نے پاکستان تحریک انصاف کو سخت پیغام دیتے ہوئے کہا ہے کہ اگر پارٹی کو احتجاج اور دھاوا بولنے کا شوق ہے تو وہ اس کی کوشش کرکے دیکھیں، انہیں اس کے نتائج بھگتنے پڑیں گے۔
لاہور میں پریس کانفرنس کے دوران محسن نقوی نے بتایا کہ اسلام آباد کے ریڈ زون میں دھرنا دے کر بدامنی پیدا کرنے کی کوشش کی گئی، تاہم حکومت نے صورتحال کو قابو میں لے لیا۔ انہوں نے واضح کیا کہ روزانہ ایسے اقدامات کرنا مناسب نہیں ہے اور کسی بھی کوشش کا انجام سخت ہو گا۔
وزیر داخلہ نے عمران خان کے طبی علاج میں تاخیر کے حوالے سے بھی بات کی اور کہا کہ اس معاملے میں ذمہ داری علیمہ خان کی ہے، کیونکہ پی ٹی آئی کی قیادت علاج کے عمل کو مکمل کرنے کی اجازت نہیں دے رہی تھی۔
محسن نقوی نے خیبر پختونخوا میں سڑکیں بند ہونے کے معاملے کو بھی افسوسناک قرار دیا اور کہا کہ عدالت نے واضح حکم دے دیا ہے کہ کے پی میں بند سڑکوں کو فوری کھولا جائے۔ انہوں نے یقین دہانی کرائی کہ عدالتی فیصلے پر مکمل عمل درآمد کروایا جائے گا اور جو لوگ سڑکیں بند کر رہے ہیں، وہ اپنے سیاسی مقاصد کے لیے عوام کو مشکلات میں ڈال رہے ہیں۔
