سابق اسپیکر قومی اسمبلی اسد قیصر نے کہا ہے کہ ان کا مطالبہ ملک میں نئے، فری اینڈ فیئر انتخابات کرانے کا ہے۔
سابق اسپیکر قومی اسمبلی اور مرکزی رہنما پی ٹی آئی اسد قیصر نے میڈیا سے گفتگو کرتے ہوئے کہا کہ ایمان مزاری اور ان کے شوہر کو جو سزا سنائی گئی ہے وہ قابل مذمت ہے اور اس سے عدالتوں پر عوام کا اعتماد مجروح ہوگا۔ انہوں نے کہا کہ اس وقت ملک میں حقیقی جمہوریت موجود نہیں اور عوام کو یہ حق حاصل ہونا چاہیے کہ وہ اپنی قیادت خود منتخب کریں۔
مرغی کی قیمت بھی عوامی پہنچ سے دور، قیمت میں بڑا اضافہ
خارجہ پالیسی پر بات کرتے ہوئے اسد قیصر نے کہا کہ غزہ امن بورڈ میں شمولیت سے قبل نہ پارلیمنٹ میں کوئی بحث کی گئی اور نہ ہی کابینہ سے منظوری لی گئی۔ ان کا کہنا تھا کہ وزیر خارجہ کو چاہیے تھا کہ پارلیمنٹ کو اعتماد میں لیتے اور اس معاملے پر ایوان میں بحث ہونی چاہیے تھی۔ انہوں نے کہا کہ پاکستان کو آزاد خارجہ پالیسی اپنانی چاہیے اور کسی بلاک کا حصہ بننے کے بجائے اپنے مفاد اور تمام پڑوسی ممالک کے ساتھ بہتر تعلقات کو ترجیح دینی چاہیے۔
تیراہ کے معاملے پر گفتگو کرتے ہوئے اسد قیصر نے کہا کہ وفاقی حکومت کی حالیہ پریس ریلیز کئی سوالات کو جنم دیتی ہے، اگر کوئی کارروائی یا فیصلہ سازی ہوتی ہے تو وفاقی اور صوبائی حکومت کو باہمی مشاورت سے فیصلے کرنے چاہئیں۔
انہوں نے واضح کیا کہ پی ٹی آئی نے ہمیشہ آپریشنز کی مخالفت کی ہے اور نیشنل ایکشن پلان پر مکمل عملدرآمد چاہتی ہے۔ ان کا کہنا تھا کہ دہشتگردی کا مکمل خاتمہ، امن، تعلیم اور روزگار ہی عوام کی اصل ضرورت ہے جبکہ اختلاف صرف طریقۂ کار پر ہے۔
اسد قیصر نے مزید کہا کہ اگر حکومت پی ٹی آئی سے مشاورت نہیں کرتی تو کم از کم دیگر سیاسی جماعتوں کو اعتماد میں لے، کیونکہ عوام کو نظرانداز کرنے کی صورت میں اس کے سنگین نتائج نکل سکتے ہیں۔
