کراچی میں ایف آئی اے نے حوالہ ہنڈی اور غیر قانونی کرنسی ایکسچینج کے خلاف بڑی کارروائی کرتے ہوئے کروڑوں روپے مالیت کی غیر ملکی کرنسی برآمد کر لی۔
ترجمان ایف آئی اے کے مطابق، ڈی جی ایف آئی اے کی ہدایت پر کارپوریٹ کرائم سرکل کراچی نے جناح انٹرنیشنل ایئرپورٹ کے پارکنگ ایریا میں کارروائی کے دوران غیر قانونی کرنسی ایکسچینج میں ملوث دو ملزمان، اسامہ عابد اور محمود بٹ، کو گرفتار کیا۔
وزیر خزانہ کا پاکستان کی کریڈٹ ریٹنگ کو B- کے ساتھ مستحکم آؤٹ لک دینے پر فچ سے اظہار تشکر
حکام کے مطابق گرفتار ملزمان کے قبضے سے ایک لاکھ امریکی ڈالر برآمد ہوئے جن کی مالیت تقریباً دو کروڑ اسی لاکھ روپے بنتی ہے۔ ملزمان لائسنس کے بغیر کرنسی ایکسچینج کا کاروبار کر رہے تھے۔
ایف آئی اے کے ترجمان کا کہنا ہے کہ ملزمان سے موبائل فونز اور غیر قانونی مالی لین دین سے متعلق شواہد بھی حاصل کر لیے گئے ہیں۔ ابتدائی تفتیش میں دونوں ملزمان برآمد شدہ کرنسی کی قانونی حیثیت کے بارے میں حکام کو مطمئن کرنے میں ناکام رہے۔
ایف آئی اے نے ملزمان کے خلاف مقدمہ درج کر کے تفتیش شروع کر دی ہے، جبکہ ان کے دیگر ساتھیوں کی گرفتاری کے لیے چھاپے مارنے کا سلسلہ جاری ہے۔
