وٹامن ڈی ہڈیوں کی مضبوطی کے ساتھ ساتھ جسم کے متعدد اہم افعال کے لیے بھی نہایت ضروری وٹامن ہے۔
وٹامن ڈی کو عموماً "سن شائن وٹامن” کہا جاتا ہے کیونکہ یہ سمجھا جاتا ہے کہ سورج کی روشنی میں رہنے سے جسم قدرتی طور پر اسے بناتا ہے۔
تاہم ایک نئی طبی تحقیق میں انکشاف ہوا ہے کہ سورج کی روشنی اور وٹامن ڈی کے درمیان تعلق اتنا مضبوط نہیں جتنا عام طور پر تصور کیا جاتا ہے۔
آزاد کشمیر کے شہر میرپور میں 45 روز بعد موبائل فون اور انٹرنیٹ سروس بحال ہونا شروع
تحقیق کے مطابق سورج کی روشنی میں زیادہ وقت گزارنے سے جسم میں وٹامن ڈی کی سطح پر نمایاں اثرات مرتب نہیں ہوتے۔
یہ تحقیق **یورپین جرنل آف کلینیکل نیوٹریشن** میں شائع ہوئی، جس میں معمر افراد میں سورج کی روشنی اور وٹامن ڈی کی سطح کے درمیان تعلق کا جائزہ لیا گیا۔
تحقیق میں 299 افراد کو شامل کیا گیا، جن میں سے زیادہ تر وٹامن ڈی کی کمی کا شکار تھے۔
ان افراد کو موسم گرما کے دوران نسبتاً زیادہ وقت سورج کی روشنی میں رکھا گیا تاکہ معلوم کیا جا سکے کہ اس سے جسم میں وٹامن ڈی کی مقدار میں کتنا اضافہ ہوتا ہے۔
محققین نے بتایا کہ اگر کوئی شخص وٹامن ڈی کی کمی کا شکار ہو تو صرف سورج کی روشنی پر انحصار کافی نہیں ہوتا۔
ان کے مطابق وٹامن ڈی سے بھرپور غذاؤں اور سپلیمنٹس کا استعمال اس کمی کو پورا کرنے میں زیادہ مؤثر ثابت ہوتا ہے۔
ماہرین کا کہنا ہے کہ بیشتر بالغ افراد کو روزانہ تقریباً 1500 سے 2000 انٹرنیشنل یونٹس وٹامن ڈی کی ضرورت ہوتی ہے، جبکہ سورج کی روشنی کے علاوہ مچھلی، فورٹیفائیڈ دودھ اور دیگر ڈیری مصنوعات سے بھی یہ وٹامن حاصل کیا جا سکتا ہے۔
**وٹامن ڈی اہم کیوں ہے؟**
وٹامن ڈی جسم کے متعدد افعال کے لیے ناگزیر ہے۔ یہ ہڈیوں کی صحت، کیلشیم کے بہتر جذب اور قوتِ مدافعت کو مضبوط بنانے میں اہم کردار ادا کرتا ہے۔
تحقیقی شواہد کے مطابق وٹامن ڈی ممکنہ طور پر بعض اقسام کے کینسر سے تحفظ فراہم کرنے میں مددگار ثابت ہو سکتا ہے، جبکہ ہڈیوں کی کمزوری، ڈپریشن، ذیابیطس ٹائپ ٹو، امراضِ قلب اور دیگر دائمی بیماریوں کے خطرے کو کم کرنے میں بھی اس کا اہم کردار ہے۔
ایک اندازے کے مطابق دنیا بھر میں تقریباً ایک ارب افراد وٹامن ڈی کی کمی کا شکار ہیں۔
