ہڈیوں، بافتوں، ریشوں اور پٹھوں کے پیچیدہ نظام کی وجہ سے گھٹنے کے جوڑ نسبتاً کمزور ہوتے ہیں۔
گھٹنوں میں درد مختلف وجوہات کی بنا پر ہو سکتا ہے، جن میں چوٹ، جوڑوں کی بیماریاں یا گھٹنے کی بافتوں کے مسائل شامل ہیں۔ ایسی صورت میں نہ صرف چلنا بلکہ سیدھا کھڑا ہونا بھی تکلیف دہ ہو جاتا ہے۔
تاہم گھٹنوں کو مضبوط بنا کر ان مسائل سے بچاؤ ممکن ہے، اور اگر درد پہلے سے موجود ہو تو اس کی شدت کو کم کیا جا سکتا ہے۔
اس سلسلے میں ایک عام عادت یا ورزش، یعنی سیڑھیاں چڑھنا، گھٹنوں کے لیے مفید ثابت ہو سکتی ہے۔
سیڑھیاں چڑھنے سے گھٹنوں کے اردگرد موجود پٹھے مضبوط ہوتے ہیں، جس سے جوڑوں پر دباؤ کم ہوتا ہے۔ یہ پٹھے رانوں تک پھیلے ہوتے ہیں اور اس سرگرمی سے ان کی مؤثر ورزش ہو جاتی ہے۔
اسی طرح سیڑھیاں چڑھنا جسمانی وزن کو قابو میں رکھنے میں مدد دیتا ہے، جو بالواسطہ طور پر گھٹنوں کے لیے فائدہ مند ہے۔ محض 5 منٹ تک سیڑھیاں چڑھنے سے تقریباً 45 کیلوریز جل سکتی ہیں، اور اگر یہ عمل ہفتے میں 5 بار کیا جائے تو 225 کیلوریز جلائی جا سکتی ہیں۔
اگر یہ معمول سال بھر، یعنی تقریباً 50 ہفتوں تک جاری رکھا جائے تو 11 ہزار 250 کیلوریز تک جلائی جا سکتی ہیں۔ چونکہ ایک پونڈ وزن میں تقریباً 3500 کیلوریز ہوتی ہیں، اس طرح ہفتے میں 5 دن صرف 5 منٹ سیڑھیاں چڑھنے سے ایک سال میں 3 پونڈ سے زائد وزن کم کرنا ممکن ہوتا ہے۔
یہ بات بھی قابلِ غور ہے کہ جسمانی وزن میں ہر 10 پونڈ اضافے سے گھٹنوں پر 30 سے 60 پونڈ تک اضافی دباؤ پڑتا ہے۔ اس لیے وزن میں کمی کے ذریعے گھٹنوں پر دباؤ کم کیا جا سکتا ہے۔
اگرچہ سیڑھیاں چڑھنا ایک محفوظ اور آسان ورزش ہے، لیکن اگر آپ اسے گھٹنوں کے درد کے علاج کے طور پر اپنانا چاہتے ہیں تو پہلے ڈاکٹر سے مشورہ ضرور کریں، تاکہ یہ معلوم ہو سکے کہ یہ ورزش کس حد تک اور کیسے کرنی چاہیے۔
دل یا سانس کے امراض میں مبتلا افراد کے لیے یہ ورزش مشکل ہو سکتی ہے، اس لیے احتیاط ضروری ہے۔
اگر آپ کو کبھی گھٹنے کی چوٹ لگی ہو یا آپ جوڑوں کی بیماری میں مبتلا ہوں تو آپ جانتے ہوں گے کہ یہ کتنا تکلیف دہ ہو سکتا ہے۔ صحت مند گھٹنے روزمرہ کی سرگرمیوں جیسے کھڑے ہونا، چلنا، دوڑنا اور بیٹھنا کے لیے نہایت اہم ہیں۔
اسی لیے گھٹنوں کے مسائل سے بچنے کے لیے احتیاطی تدابیر اختیار کرنا ضروری ہے۔ سیڑھیاں چڑھنے کے ساتھ ساتھ ٹانگوں کو مضبوط بنانے والی دیگر ورزشیں بھی مفید ثابت ہو سکتی ہیں، جبکہ ایسی سرگرمیوں سے پرہیز کرنا چاہیے جو گھٹنوں کو نقصان پہنچائیں، خاص طور پر درمیانی عمر میں زیادہ احتیاط کی ضرورت ہوتی ہے۔
جسمانی وزن کو متوازن رکھنا بھی گھٹنوں کے درد سے بچاؤ میں اہم کردار ادا کرتا ہے۔
نوٹ: یہ معلومات طبی تحقیق پر مبنی ہیں، اس لیے کسی بھی ورزش یا علاج سے قبل اپنے معالج سے مشورہ ضرور کریں۔
