اسلام آباد (مدثر چوہدری) وزیرِاعظم شہباز شریف نے کہا ہے کہ پاکستان بھارت کے ساتھ تمام حل طلب مسائل پر بامعنی اور نتیجہ خیز مذاکرات کے لیے تیار ہے۔ انہوں نے خطے میں امن و استحکام کو پاکستان کی اولین ترجیح قرار دیا۔
یہ بات انہوں نے برطانوی ہائی کمشنر جین میروٹ سے ملاقات کے دوران کہی، جو بدھ کے روز اسلام آباد میں ان سے ملیں۔ ملاقات میں وزیرِاعظم نے شاہ چارلس سوم اور وزیرِاعظم کیئر سٹارمر کے لیے نیک تمناؤں کا اظہار کیا اور رواں سال برطانوی قیادت سے ملاقات کی امید ظاہر کی۔
شہباز شریف نے برطانیہ کے ساتھ پی آئی اے کی پروازیں بحال ہونے کے فیصلے کا خیر مقدم کیا اور کہا کہ یہ اقدام برطانیہ میں مقیم پاکستانی کمیونٹی کے لیے سہولت کا باعث بنے گا۔ انہوں نے اس اقدام کو عوامی روابط مضبوط بنانے کی جانب مثبت قدم قرار دیا۔
پاکستان اور برطانیہ کے تعلقات پر بات کرتے ہوئے وزیرِاعظم نے تجارتی روابط میں بہتری اور اقوامِ متحدہ کی سیکیورٹی کونسل میں قریبی تعاون کو سراہا، جہاں اس وقت پاکستان ماہانہ صدارت کے فرائض انجام دے رہا ہے۔ انہوں نے خطے میں برطانیہ کے مثبت کردار کی بھی تعریف کی۔
برطانوی ہائی کمشنر نے وزیرِاعظم کا شکریہ ادا کیا اور انہیں لندن میں اپنی حالیہ ملاقاتوں سے متعلق بریفنگ دی۔ انہوں نے پاکستان کی معاشی کارکردگی کو سراہتے ہوئے کہا کہ گزشتہ ڈیڑھ سال میں واضح بہتری دیکھنے میں آئی ہے، جو وزیرِاعظم کی قیادت میں ممکن ہوئی۔
دونوں رہنماؤں نے تجارت، سفارتکاری اور علاقائی استحکام کے فروغ میں تعاون جاری رکھنے کے عزم کا اعادہ کیا۔
