بالی ووڈ اسٹار بننے سے پہلے دیپیکا پڈوکون کے پاس کتنے پیسے تھے؟ دلچسپ انکشاف

ویب ڈیسک: بالی ووڈ کی صفِ اول کی اداکارہ دیپیکا پڈوکون نے اپنے کیریئر کے ابتدائی دنوں سے متعلق ایک دلچسپ واقعہ بیان کرتے ہوئے انکشاف کیا ہے کہ انہیں ماڈلنگ پورٹ فولیو بنوانے کے لیے اپنی والدہ سے 10 ہزار روپے قرض لینا پڑے تھے۔

بھارتی میڈیا رپورٹس کے مطابق دیپیکا پڈوکون نے امریکی میزبان ایلن ڈی جینیرس کے معروف ٹی وی شو میں شرکت کے دوران اپنی زندگی اور شوبز کیریئر کے ابتدائی مراحل سے متعلق گفتگو کی تھی۔

اس موقع پر اداکارہ نے بتایا کہ جب انہوں نے ماڈلنگ کی دنیا میں قدم رکھنے کا فیصلہ کیا تو ان کے پاس پورٹ فولیو تیار کروانے کے لیے مطلوبہ رقم موجود نہیں تھی۔ اس لیے انہوں نے اپنی والدہ سے 10 ہزار روپے ادھار لیے تاکہ پیشہ ورانہ ماڈلنگ پورٹ فولیو بنوا سکیں۔

دیپیکا کے مطابق انہوں نے والدہ سے رقم لیتے وقت وعدہ کیا تھا کہ وہ نہ صرف یہ پیسے واپس کریں گی بلکہ اپنی محنت اور کامیابی کے ذریعے انہیں فخر محسوس کرنے کا موقع بھی دیں گی۔

آج دیپیکا پڈوکون کا شمار بھارتی فلم انڈسٹری کی کامیاب اور مقبول ترین اداکاراؤں میں ہوتا ہے۔ انہوں نے بالی ووڈ میں متعدد کامیاب فلموں میں اداکاری کے جوہر دکھائے جبکہ ہالی ووڈ فلم ’ایکس ایکس ایکس: ریٹرن آف زینڈر کیج‘ میں کام کرکے عالمی سطح پر بھی اپنی پہچان بنائی۔

گفتگو کے دوران اداکارہ نے اپنے والد پرکاش پڈوکون کے کھیلوں سے وابستہ ماضی کا ذکر بھی کیا۔ ان کے والد بھارت کے معروف بیڈمنٹن کھلاڑی رہے ہیں اور اس وقت انہوں نے اس کھیل میں نمایاں مقام حاصل کیا جب ملک میں پیشہ ورانہ سطح پر بیڈمنٹن کا رجحان زیادہ عام نہیں تھا۔

دیپیکا کا کہنا تھا کہ ان کے والد نے ایسے دور میں کھیل کو اپنا پیشہ بنایا جب زیادہ تر لوگ ڈاکٹر یا وکیل بننے کو ترجیح دیتے تھے۔

اداکارہ نے مزید بتایا کہ اگر وہ اپنے والد کے نقش قدم پر چلتے ہوئے بیڈمنٹن کو بطور پیشہ اختیار کرتیں تو انہیں خوشی ہوتی، تاہم ان کے والد نے ہمیشہ انہیں اپنی پسند کے مطابق زندگی گزارنے اور اپنے دل کی آواز سننے کا مشورہ دیا۔

دیپیکا پڈوکون کے مطابق انہیں محض 16 برس کی عمر میں احساس ہوگیا تھا کہ وہ اداکاری کے شعبے میں اپنا مستقبل بنانا چاہتی ہیں، کیونکہ انہیں کیمرے کے سامنے کام کرنا بے حد پسند تھا۔

اداکارہ کا یہ انکشاف ان کے مداحوں کے لیے دلچسپی کا باعث بن رہا ہے، کیونکہ آج عالمی شہرت رکھنے والی دیپیکا کے فلمی سفر کا آغاز محدود وسائل اور ایک چھوٹے سے خواب سے ہوا تھا۔