لاہور کی تاریخی اور سرسبز جامعہ پنجاب میں درختوں کی مبینہ طور پر غیر قانونی کٹائی کا ایک سنگین معاملہ منظرِ عام پر آیا ہے جس میں ٹمبر مافیا کی سرگرمیوں کا انکشاف ہوا ہے۔ اطلاعات کے مطابق یہ واقعہ شیخ زاید اسلامک سینٹر کے احاطے میں پیش آیا جہاں درخت کاٹے گئے، اس عمل کو ماحولیاتی قوانین اور یونیورسٹی کی طے شدہ پالیسیوں کی کھلی خلاف ورزی قرار دیا جا رہا ہے۔
سرکاری سکولوں میں اساتذہ کی تعلیمی اہلیت سے متعلق چونکا دینے والے انکشافات
ذرائع کا کہنا ہے کہ درختوں کی کٹائی کے بعد ٹمبر مافیا کی جانب سے قیمتی لکڑی سمگل کرنے کی کوشش کی گئی اور کٹے ہوئے درختوں کو ایک ٹریکٹر ٹرالی میں بھر کر لے جایا جا رہا تھا۔ تاہم موقع پر بروقت کارروائی کرتے ہوئے لکڑی سے لدی ٹریکٹر ٹرالی کو تحویل میں لے لیا گیا، لیکن اس سے قبل ہی درختوں کا قتلِ عام کیا جا چکا تھا جس کے نتیجے میں ماحول کو ناقابلِ تلافی قدرتی نقصان پہنچا ہے۔
پارکس اینڈ ہارٹیکلچر اتھارٹی (پی ایچ اے) نے اس واقعے کی سنگینی کی تصدیق کرتے ہوئے بتایا ہے کہ انہوں نے درختوں کی کٹائی رکوائی اور لکڑی کو قبضے میں لے لیا ہے۔ پی ایچ اے کی جانب سے وائس چانسلر پنجاب یونیورسٹی کو ایک باضابطہ مراسلہ بھی ارسال کیا گیا ہے جس میں اس معاملے پر فوری اور سخت کارروائی کا مطالبہ کیا گیا ہے تاکہ تعلیمی ادارے کی زمین پر اس قسم کی غیر قانونی سرگرمیوں کا سدِباب ہو سکے۔
اس مراسلے میں مزید کہا گیا ہے کہ درختوں کی کٹائی اور لکڑی کی غیر قانونی منتقلی میں ملوث عناصر کی فوری نشاندہی کر کے ان کے خلاف قانونی چارہ جوئی کی جائے۔ پی ایچ اے نے واضح کیا ہے کہ کسی بھی قسم کی کٹائی یا حتیٰ کہ درختوں کی تراش خراش کے لیے بھی پیشگی منظوری لینا لازمی ہے اور اس کے بغیر کوئی بھی اقدام ناقابلِ قبول ہے۔
پی ایچ اے نے جامعہ انتظامیہ پر زور دیا ہے کہ مستقبل میں ایسے واقعات کی روک تھام کے لیے ٹھوس اور مستقل اقدامات کیے جائیں۔ اس حوالے سے ماحولیاتی ماہرین نے گہری تشویش کا اظہار کرتے ہوئے کہا ہے کہ پنجاب یونیورسٹی جیسے سرسبز کیمپس میں درختوں کا اس طرح کاٹا جانا ماحولیاتی تحفظ کی کوششوں پر ایک بڑا سوالیہ نشان کھڑا کرتا ہے۔
