خیبرپختونخوا میں سینیٹ انتخابات سے قبل سیاسی سرگرمیاں اپنے عروج پر پہنچ چکی ہیں۔ صوبے کی اپوزیشن جماعتوں نے 21 جولائی کو ہونے والے سینیٹ انتخابات میں اپنے امیدوار کسی صورت دستبردار نہ کرنے کا حتمی فیصلہ کر لیا ہے۔
اس حوالے سے گورنر خیبرپختونخوا فیصل کریم کنڈی کی زیر صدارت گورنر ہاؤس پشاور میں اپوزیشن جماعتوں کے رہنماؤں کا اہم اجلاس منعقد ہوا۔ اجلاس میں فیصلہ کیا گیا کہ پیر کے روز ہونے والے انتخابات میں اپوزیشن کا کوئی بھی امیدوار میدان نہیں چھوڑے گا۔
اجلاس میں حکومت اور اپوزیشن کے درمیان 5 اور 6 کے فارمولے پر عمل درآمد جاری رکھنے پر بھی اتفاق کیا گیا۔ اس موقع پر جمعیت علمائے اسلام (ف) کے مرکزی رہنما سینیٹر مولانا عطاالرحمن، اپوزیشن لیڈر ڈاکٹر عباد، پیپلز پارٹی کے پارلیمانی لیڈر احمد کنڈی اور دیگر اپوزیشن جماعتوں کے امیدوار شریک ہوئے۔ اجلاس کے دوران سینیٹ الیکشن سے متعلق موجودہ سیاسی صورتحال کا جائزہ لیا گیا اور آئندہ کی حکمت عملی پر غور کیا گیا۔
دوسری جانب، تحریک انصاف (پی ٹی آئی) کی سیاسی کمیٹی نے بھی سینیٹ انتخابات کے تناظر میں متحرک کردار ادا کرتے ہوئے ناراض امیدواروں کو کاغذات نامزدگی واپس لینے پر آمادہ کر لیا ہے۔
