پاکستان نے اقوام متحدہ کے ہائی کمشنر برائے انسانی حقوق کے 27 ویں آئینی ترمیم سے متعلق بیان کو مسترد کر دیا ہے۔ دفتر خارجہ کا کہنا ہے کہ پاکستان کی پارلیمنٹ کی منظور کردہ 27 ویں آئینی ترمیم پر اقوام متحدہ کی تشویش بے جا اور ناقابل فہم ہے۔ بیان میں کہا گیا کہ آئینی ترامیم کرنا عوام کے منتخب نمائندوں کا مکمل اختیار ہے اور جمہوری طریقہ کار کا احترام ہونا چاہیے۔ پاکستان انسانی حقوق، انسانی وقار، بنیادی آزادیوں اور قانون کی حکمرانی کے تحفظ کے عزم پر قائم ہے۔
اسلام آباد میں 3 میگا منصوبے تکمیل کے قریب، وزیر داخلہ کا تعمیراتی پیشرفت پر اظہار اطمینان
دفتر خارجہ نے افسوس کا اظہار کرتے ہوئے کہا کہ پاکستان کا مؤقف اور زمینی حقائق اقوام متحدہ کے بیان میں شامل نہیں کیے گئے۔ یو این ہائی کمشنر کو چاہیے کہ خودمختار فیصلوں کا احترام کریں اور سیاسی تعصب یا غلط معلومات پر مبنی تبصروں سے گریز کریں۔
یاد رہے کہ اقوام متحدہ کے انسانی حقوق کے کمشنر نے اپنے بیان میں کہا تھا کہ پاکستان میں جلد بازی میں منظور کی گئی آئینی ترمیم عدلیہ کی آزادی کو کمزور کرتی ہے۔ ولکر ٹرک نے ملٹری احتساب سے متعلق بھی تحفظات کا اظہار کیا تھا۔ ان کا کہنا تھا کہ گزشتہ سال کی 26 ویں آئینی ترمیم کی طرح یہ ترمیم بھی وکلا برادری اور سول سوسائٹی سے بڑے پیمانے پر مشاورت اور بحث کے بغیر کی گئی۔
