اسلام آباد میں کچھ وزرا کے حالیہ بیانات کے باوجود اعلیٰ سرکاری حکام کا کہنا ہے کہ اس وقت 28ویں آئینی ترمیم سے متعلق کوئی تجویز زیر غور نہیں ہے۔
پارلیمانی امور کے وزیر ڈاکٹر طارق فضل چوہدری نے واضح طور پر اس تاثر کی تردید کی کہ حکومت 28ویں آئینی ترمیم کے کسی پیکج پر کام کر رہی ہے۔ انہوں نے ایک اخبار سے بات کرتے ہوئے کہا کہ "کوئی 28ویں ترمیم زیر غور نہیں ہے”۔
مخالفین کیلئے جاسوسی کا الزام، 17 افراد کو سزائے موت سنا دی گئی
وزیراعظم ہاؤس کے ایک اہم عہدیدار نے بھی بتایا کہ وزیراعظم آفس میں کسی نئی آئینی ترمیم سے متعلق کچھ نہیں دیکھا جا رہا۔ ذرائع کے حوالے سے کہا گیا کہ ایسی کوئی تجویز زیر غور نہیں ہے۔
ڈاکٹر طارق فضل چوہدری نے وضاحت کی کہ اس معاملے پر کوئی اجلاس نہیں ہوا اور موجودہ بحث کو میڈیا کی پیدا کردہ قرار دیا۔ انہوں نے بتایا کہ 27ویں آئینی ترمیم کے پیکج میں شامل کچھ تجاویز جو اتفاق رائے نہ ہونے کے باعث خارج کر دی گئی تھیں، آئندہ کبھی دوبارہ زیر غور آ سکتی ہیں، لیکن فی الحال 28ویں ترمیم شروع کرنے کا کوئی عمل جاری نہیں ہے۔
انہوں نے زور دے کر کہا کہ "اس وقت 28ویں آئینی ترمیم پر کوئی غور نہیں ہو رہا” اور بتایا کہ انہوں نے اس بات کی وزیر قانون سے دوبارہ تصدیق بھی کر لی ہے۔ ان کا کہنا تھا کہ "جو بھی 28ویں ترمیم کے بارے میں پوچھ رہا ہے، اسے یہی جواب دیا جا رہا ہے کہ ایسی کوئی تجویز زیر غور نہیں”۔
یہ وضاحتیں چند وزرا کی جانب سے 28ویں ترمیم کا ذکر کیے جانے کے بعد سامنے آئی ہیں۔ وزیراعظم کے مشیر برائے سیاسی و عوامی امور رانا ثناء اللہ نے چند روز قبل ایک بیان میں کہا تھا کہ حکومت "جلد 28ویں آئینی ترمیم” متعارف کرائے گی۔ چنیوٹ میں صحافیوں سے گفتگو میں مبینہ طور پر انہوں نے کہا تھا کہ مجوزہ ترمیم کا تعلق مقامی حکومتوں، نیشنل فنانس کمیشن اور صحت سے متعلق امور سے ہوگا۔
انہوں نے مزید کہا تھا کہ ان موضوعات پر مشاورت جاری ہے اور اگر اتفاق رائے ہوا تو حکومت اس سمت میں پیش قدمی کر سکتی ہے۔ وزیر مملکت برائے قانون بیرسٹر عدیل ملک کے بارے میں بھی میڈیا میں رپورٹس آئی تھیں کہ انہوں نے 28ویں ترمیم سے متعلق بات کی ہے، تاہم گزشتہ چند دنوں میں متعدد کوششوں کے باوجود وہ کالز کا جواب نہیں دے سکے۔
