امریکا نے بھارت کو ایرانی چاہ بہار بندرگاہ (chabahar port)سے متعلق دی گئی چھوٹ واپس لے لی ہے۔
امریکی محکمہ خارجہ کے مطابق ایران پر زیادہ سے زیادہ دباؤ ڈالنے کیلئے چھوٹ واپس لی گئی ہے۔چاہ بہار بندرگاہ کو آپریٹ کرنے والے افراد یا اداروں پر پابندیاں لگیں گی،فیصلہ 29 ستمبر 2025 سے مؤثر ہو گا۔
بھارت اور امریکا کے درمیان نئی دہلی میں ہونے والے اہم تجارتی مذاکرات کسی نتیجے پر نہ پہنچ سکے۔مذاکرات میں امریکی وفد کی قیادت برینڈن لنچ جبکہ بھارتی وفد کی قیادت راجیش اگروال نے کی۔ فریقین نے مزید ملاقاتوں پر تو اتفاق کیا لیکن بڑے مسائل پر پیش رفت نہ ہوسکی۔
بعدازاں بھارتی وزیر تجارت سنیل برتھوال نے میڈیا سے گفتگو میں بتایا کہ امریکا کے ساتھ کئی سطحوں پر بات چیت جاری ہے تاہم روس سے تیل کی خریداری کے معاملے پر اختلافات برقرار ہیں اور واشنگٹن اس پر مسلسل دباؤ ڈال رہا ہے۔
ان کا کہنا تھا کہ امریکا چاہتا ہے بھارت زرعی مصنوعات، دودھ اور گندم پر عائد بلند ٹیکسز کم کرے تاکہ تجارتی ڈیل آگے بڑھ سکے۔
