بھارت کے اپوزیشن لیڈر راہول گاندھی نے پاک-بھارت کشیدگی کے دوران 5 بھارتی طیاروں کے مار گرائے جانے سے متعلق امریکی صدر ڈونلڈ ٹرمپ کے حالیہ بیان پر وزیراعظم نریندر مودی سے وضاحت طلب کر لی ہے۔ امریکی صدر نے وائٹ ہاؤس میں گفتگو کے دوران تصدیق کی کہ پاک-بھارت جنگ کے دوران 5 طیارے گرائے گئے تھے، تاہم انہوں نے اس بارے میں مزید تفصیلات نہیں بتائیں۔
صدر ٹرمپ کے اس بیان کے بعد راہول گاندھی نے سوشل میڈیا پر وزیراعظم مودی سے سوال کیا: "مودی جی، 5 طیاروں کا سچ کیا ہے؟ قوم جاننا چاہتی ہے۔” انہوں نے اپنے پیغام کے ساتھ ٹرمپ کے بیان کی ویڈیو بھی شیئر کی۔
ادھر کانگریس کی ترجمان نے بھی پاک-بھارت جنگ کے دوران بھارتی عہدیداروں کے وہ بیانات شیئر کیے ہیں جن میں بھارتی فضائی جہازوں کے گرنے کا اعتراف کیا گیا تھا۔ بھارتی چیف آف ڈیفنس اسٹاف جنرل انیل چوہان نے ایک انٹرویو میں کہا کہ اصل سوال یہ نہیں کہ جہاز گرے، بلکہ یہ جاننا زیادہ اہم ہے کہ وہ کیسے گرے۔
کانگریس کی ترجمان کا کہنا ہے کہ ان تمام بیانات کے باوجود وزیراعظم نریندر مودی خاموش ہیں۔
یاد رہے کہ اپریل میں مقبوضہ کشمیر کے علاقے پہلگام میں ہونے والے ایک حملے میں 26 افراد ہلاک ہوئے تھے، جس کا الزام بھارت نے بغیر کسی ثبوت کے پاکستان پر عائد کیا۔ پاکستان نے اس الزام کو مسترد کرتے ہوئے غیرجانبدارانہ تحقیقات میں تعاون کی پیشکش کی تھی۔ تاہم، بھارت نے اس حملے کو جواز بنا کر 7 مئی کو پاکستان پر جنگ مسلط کی، جس کے جواب میں پاکستان نے بھرپور کارروائی کرتے ہوئے رافیل سمیت بھارت کے 5 طیارے مار گرائے۔
