برسٹل کی ایک عدالت نے تین افغان شہریوں اور ایک نوعمر لڑکے کو گزشتہ سال ایک 17 سالہ برطانوی لڑکی کو گرومنگ کرنے اور ریپ کرنے کا مجرم قرار دے دیا ہے۔ ان تینوں ملزمان کو عدالت میں سزا سنائے جانے سے قبل فرانس فرار ہونے کی کوشش کے دوران گرفتار کیا گیا تھا۔
ملزمان میں مہراب صافی (21 سال)، سلمان حبیب خیل (19 سال)، اول احمدزئی (19 سال) اور ایک 17 سالہ لڑکا شامل ہیں، جس کا نام عمر کی وجہ سے ظاہر نہیں کیا جا سکتا۔ چاروں نے اپنے خلاف تمام الزامات سے انکار کیا تھا، تاہم جمعہ 26 جون کو برسٹل کراؤن کورٹ میں جیوری نے انہیں قصوروار پایا۔
ٹرمپ نے ایک ہی سال میں 2 ارب ڈالر کیسے کمائے؟ مالیاتی رپورٹ نے تہلکہ مچادیا
عدالت میں بتایا گیا کہ متاثرہ لڑکی 25 نومبر 2025 کو ایک دوست کے ساتھ کرسمس شاپنگ کے لیے برسٹل گئی تھی، جہاں اس کی ملاقات صافی سے ہوئی۔ صافی نے دونوں کو اپنے گھر آنے کی دعوت دی اور نشہ آور اشیاء اور فون چارج کرنے کی جگہ فراہم کرنے کی پیشکش کی، لیکن دونوں نے انکار کر دیا اور واپس چلی گئیں۔ ان کے جانے کے فوری بعد صافی نے لڑکی کو پیغامات بھیجنا شروع کر دیے، اسے سنیپ چیٹ پر شامل کیا اور وہاں نامناسب تصاویر طلب کیں۔
چار دن بعد، 29 نومبر کی شب صافی نے حبیب خیل کے ساتھ مل کر ایک ٹیکسی کے ذریعے لڑکی کو برسٹل بلوایا۔ وہاں سے اسے شہر کے سینٹ وربرگس علاقے میں صافی کے گھر لے جایا گیا، جہاں اسے اتنی زیادہ الکوحل پلائی گئی کہ وہ نشے میں بے ہوش ہو گئی۔ اس کے بعد چاروں ملزمان نے کئی گھنٹوں تک اس کے ساتھ جنسی زیادتی اور ریپ کا سلسلہ جاری رکھا۔
30 نومبر کی صبح متاثرہ لڑکی کی والدہ نے پولیس کو اس کے لاپتہ ہونے کی اطلاع دی۔ کچھ دیر بعد پولیس افسران صافی کے گھر پہنچے، جہاں لڑکی اور 17 سالہ لڑکے کو موجود پایا گیا۔ لڑکی نے موقع پر موجود افسر کو ریپ کی شکایت درج کرائی، جس پر 17 سالہ لڑکے کو گرفتار کر لیا گیا۔ پولیس کی آمد دیکھتے ہی تینوں مرد گھر سے فرار ہو گئے، تاہم چند روز بعد فرانس جاتے ہوئے انہیں گرفتار کر کے برطانیہ واپس لایا گیا۔
عدالت کو یہ بھی بتایا گیا کہ حبیب خیل اور احمدزئی کے فونوں سے اس واقعے کی خبروں اور اس نوعیت کے جرائم کے حوالے سے پولیس اور عدالتی طریقہ کار کے بارے میں آن لائن تلاش کی گئی تھی۔
چاروں افغان شہریوں پر عائد الزامات میں مہراب صافی پر دو شماروں میں ریپ اور ایک شمار میں لڑکی کو استحصال کے لیے سفر ترتیب دینے کا الزام تھا، جبکہ سلمان حبیب خیل پر ایک شمار ریپ اور ایک شمار استحصال کے لیے سفر ترتیب دینے کا الزام عائد کیا گیا۔ اول احمدزئی پر ایک شمار ریپ اور ایک شمار جنسی زیادتی کا الزام تھا، اور 17 سالہ لڑکے پر ایک شمار ریپ کا مقدمہ درج کیا گیا تھا۔
تمام ملزمان نے الزامات کو مسترد کرتے ہوئے دعویٰ کیا کہ یہ باہمی رضامندی سے ہونے والی جنسی سرگرمی تھی، لیکن برسٹل کراؤن کورٹ کی جیوری نے انہیں تمام الزامات میں مجرم قرار دے دیا۔ عدالت نے ان کی سزا کا فیصلہ 6 اکتوبر کو سنانے کا اعلان کیا ہے۔
