سپریم کورٹ؛ افغان شہری کو پاکستانی شہریت دینے سے متعلق پشاور ہائیکورٹ کا فیصلہ معطل

سپریم کورٹ نے مرد افغان شہری کو پاکستانی خاتون سے شادی کی بنیاد پر شہریت دینے سے متعلق پشاور ہائی کورٹ کا فیصلہ معطل کر دیا ہے۔

جسٹس شاہد وحید کی سربراہی میں تین رکنی بینچ نے پاکستان اوریجن کارڈ کے اجراء سے متعلق کیس کی سماعت کی۔ ایڈیشنل اٹارنی جنرل رانا اسد اللہ نے عدالت کو بتایا کہ وفاق نے ہائی کورٹ کے یکم دسمبر 2023 کے فیصلے کے خلاف اپیل دائر کر رکھی ہے، جس میں کہا گیا تھا کہ پاکستانی خاتون سے شادی کرنے والے افغان مرد کو پاکستان اوریجن کارڈ اور شہریت دی جا سکتی ہے۔

آسٹریلوی کرکٹر پریکٹس سیشن کے دوران گردن پر گیند لگنے سے ہلاک

انہوں نے وضاحت کی کہ حکومت کو شہریت دینے والے حصے پر اعتراض ہے۔ سماعت کے دوران جسٹس مسرت ہلالی نے پوچھا کہ شہریت دینے کی بنیاد کیا ہے اور کتنے افراد نے درخواستیں دی ہیں؟ ایڈیشنل اٹارنی جنرل نے بتایا کہ اب تک 117 درخواست گزار سامنے آئے ہیں، جس پر جسٹس مسرت ہلالی نے ریمارکس دیے کہ “یہ تو وہ ہیں جو سامنے آئے ہیں۔”

نادرا کے وکیل نے کہا کہ پاکستانی خاتون سے شادی کرنے والے افغان شہری کے لیے درست ویزا ہونا بھی لازمی ہے۔ اس پر جسٹس مسرت ہلالی نے ریمارکس دیے کہ یہ دیکھنا ہوگا کہ کوئی شخص دیوار پھلانگ کر آیا یا دروازے سے داخل ہوا۔

ایڈیشنل اٹارنی جنرل نے مزید بتایا کہ ہائی کورٹ کے فیصلے کے بعد توہین عدالت کی درخواستیں بھی دائر کی جا رہی ہیں۔ عدالت نے فریقین کو نوٹس جاری کرتے ہوئے پشاور ہائی کورٹ کا فیصلہ معطل کر دیا اور کیس کی مزید سماعت ملتوی کر دی۔