**پاکستان میں ادویات اور میڈیکل آلات کی برآمدات میں 34 فیصد اضافہ**
پاکستان میں ادویات اور میڈیکل آلات کی برآمدات میں گزشتہ مدت کے مقابلے میں 34 فیصد قابل ذکر اضافہ ریکارڈ کیا گیا ہے۔ یہ ترقی ڈریپ (ڈرگ ریگولیٹری اتھارٹی آف پاکستان) میں نافذ کردہ اصلاحات اور نظام میں بڑھتی ہوئی شفافیت کا براہ راست نتیجہ بتائی جا رہی ہے۔
جسٹس (ر) منصور علی شاہ کا پریکٹس شروع کرنے کا اعلان
ادارے کے اعدادوشمار کے مطابق، منظوری اور رجسٹریشن کے عمل میں لائی گئی اصلاحات نے نہ صرف اربوں روپے کی بچت ممکن بنائی ہے، بلکہ اس کا فائدہ براہ راست عوام کو پہنچا ہے۔ ڈیجیٹلائزیشن کے ذریعے جدید اور جان بچانے والی ٹیکنالوجیز اب مریضوں تک بروقت پہنچ رہی ہیں۔
ڈریپ اپنے ریگولیٹری امور کا تقریباً 70 فیصد ڈیجیٹل کر چکا ہے، اور مارچ 2026 تک 100 فیصد ڈیجیٹلائزیشن کا ہدف رکھتا ہے۔ آن لائن میڈیکل ڈیوائسز رجسٹریشن سسٹم اور ای-آفس جیسے اقدامات سے انسانی غلطیوں اور تاخیر میں نمایاں کمی آئی ہے، جبکہ نظام میں شفافیت بڑھی ہے۔
برآمدات کو فروغ دینے کے لیے سرٹیفکیشن جاری کرنے کے دورانیے میں نمایاں کمی کی گئی ہے۔ خاص طور پر، ادویات کی برآمدی رجسٹریشن کا دورانیہ 60 دن سے کم ہو کر محض 10 دن رہ گیا ہے، جس سے برآمد کنندگان کے لیے عمل میں تیزی اور آسانی آئی ہے۔
