لاہور – سوئی ناردرن گیس پائپ لائنز لمیٹڈ (SNGPL) نے گیس چوری کے خلاف جاری کریک ڈاؤن کے دوران پنجاب، خیبر پختونخوا اور اسلام آباد میں مزید 77 غیر قانونی کنکشن منقطع کر دیے ہیں اور مجموعی طور پر 22 لاکھ روپے سے زائد کے جرمانے عائد کیے ہیں۔
تفصیلات کے مطابق، لاہور میں 14 غیر قانونی کنکشن منقطع کیے گئے اور اس پر 5 لاکھ 10 ہزار روپے کے جرمانے لگائے گئے۔ گوجرانوالہ میں 2 غیر قانونی کنکشن ختم کیے گئے اور 50 ہزار روپے کا جرمانہ عائد کیا گیا۔ ملتان میں 9 کنکشن غیر قانونی استعمال پر جبکہ 18 کنکشن کمپریسر کے استعمال پر منقطع کیے گئے۔ فیصل آباد میں 4 غیر قانونی کنکشن منقطع کیے گئے اور 30 ہزار روپے جرمانہ لگایا گیا۔ شیخوپورہ میں 1 کنکشن غیر قانونی استعمال پر منقطع کیا گیا اور 9 لاکھ 70 ہزار روپے کا جرمانہ عائد کیا گیا۔ ساہیوال میں 3 کنکشن غیر قانونی استعمال پر منقطع کیے گئے، جبکہ بہاولپور میں 1 غیر قانونی کنکشن اور کمپریسر کے استعمال پر 7 کنکشن منقطع کیے گئے۔
خیبر پختونخوا میں مردان کے علاقے میں 18 غیر قانونی کنکشن ختم کیے گئے اور اس پر 6 لاکھ 70 ہزار روپے جرمانے عائد کیے گئے۔
یہ کاروائیاں سوئی ناردرن گیس پائپ لائنز کی جانب سے گیس چوری کی روک تھام اور صارفین کے حقوق کے تحفظ کے لیے کی جا رہی ہیں۔
