اسلام آباد (سپورٹس رپورٹر) پاکستان فٹ بال فیڈریشن کے زیر اہتمام نیشنل چیلنج کپ 2023 فائنل راؤنڈ کا آغاز یکم مئی سے اسلام آباد کے جناح سپورٹس کمپلیکس میں شروع ہوگیا۔
نیشنل چیلنج کپ 2023 فائنل راﺅنڈ کے پہلے روز 4 میچوں کا فیصلہ ہوا۔
پہلے میچ میں ایچ ای سی نے نمسو کو 3-1 سے شکست دے دی۔
دوسرے میچ میں ایس اے فارمز اور ماشا یونائیٹڈ کا مقابلہ بغیر کسی گول کے برابر رہا۔
تیسرے میچ میں پاکستان آرمی نے پاکا کو 4-0 سے شکست دی۔
چوتھے میچ میں پاک نیوی نے کے آر ایل کو 3-1 سے زیر کیا۔
ٹیموں کو چار گروپس میں تقسیم کیا گیا ہے، ہر گروپ میں چار ٹیمیں شامل ہیں۔
گروپ اے میں پاکا، پاکستان آرمی، نمسو اور ایچ ای سی گروپ بی میں کےآر ایل، پاکستان نیوی، ایس اے فارمز اور ماشا یونائیٹڈ، گروپ سی میں اوٹو کرینز، واپڈا، ڈبلیو ایس ٹی سی اور پاکستان پولیس، گروپ ڈی میں پی اے ایف، ایشیا گھی ملز، ایس اے گارڈنز اور پاکستان ریلوے کی ٹیمیں شامل ہیں۔
گروپ مرحلہ یکم سے 6 مئی تک ہوگا جس میں ہر ٹیم تین تین میچ کھیلے گی۔
ہر گروپ سے سرفہرست دو ٹیمیں کوارٹر فائنل میں جگہ بنائیں گی جو 7 اور 8 مئی کو شیڈول ہیں، سیمی فائنل مقابلے 10 مئی جبکہ فائنل 12 مئی کو ہوگا۔
