پاکستان سپورٹس بورڈ (پی ایس بی) نے ایشین چیمپئن شپ میں شاندار کامیابی حاصل کرنے پر انڈر-16 والی بال ٹیم کو 82 لاکھ روپے کے کیش ایوارڈ دینے کا اعلان کیا ہے۔
پی ایس بی کے ترجمان کے مطابق ٹیم کے ہر کھلاڑی کو تاریخی فتح پر 6 لاکھ روپے کی انعامی رقم دی جائے گی۔ پی ایس بی کی کیش ایوارڈ پالیسی 2024 کے تحت براعظمی سطح کے ٹیم ایونٹس میں گولڈ میڈل جیتنے والے کھلاڑی کو انفرادی انعام کا 30 فیصد دیا جاتا ہے۔ اسی پالیسی کے تحت 12 رکنی اسکواڈ کے لیے مجموعی طور پر 72 لاکھ روپے کی انعامی رقم مختص کی گئی ہے۔
ترجمان نے مزید بتایا کہ کوچنگ اسٹاف کے لیے ٹیم ایوارڈ کا 50 فیصد مختص کیا گیا ہے، جس کے تحت کوچ کو 10 لاکھ روپے کیش انعام دیا جائے گا۔ اس طرح کھلاڑیوں اور کوچنگ اسٹاف کو مجموعی طور پر 82 لاکھ روپے کیش ایوارڈز آئندہ چند روز میں فراہم کیے جائیں گے۔
پاکستان سپورٹس بورڈ کے مطابق پاکستان نے ایشین چیمپئن شپ کے سنسنی خیز فائنل میں ایران کو 2-3 سے شکست دے کر ٹرافی اپنے نام کی، اور پورے ٹورنامنٹ میں ناقابلِ شکست رہا۔
ترجمان کا کہنا تھا کہ مختلف عمر کے کھلاڑیوں کی حوصلہ افزائی اور مالی معاونت پی ایس بی کی پالیسی کا اہم حصہ ہے۔ کیش ایوارڈز صرف ان کھلاڑیوں اور کوچز کو دیے جائیں گے جن کے نام ٹورنامنٹ کی آفیشل فہرست میں شامل ہوں گے، اور انعامات حاصل کرنے کے لیے تمام ضروری دستاویزات مکمل ہونا لازم ہوں گی۔
