پاکستان کی معروف اداکارہ صبا قمر زمان نے اپنے خلاف مقدمہ درج کرنے کی درخواست سامنے آنے کے بعد پہلی مرتبہ ردِعمل دے دیا ہے۔ مختلف میڈیا رپورٹس کے مطابق صبا قمر کے خلاف لاہور کی سیشن کورٹ میں درخواست دائر کی گئی ہے جس میں الزام عائد کیا گیا ہے کہ انہوں نے سرکاری اجازت کے بغیر پولیس کی وردی استعمال کی۔
یہ معاملہ اس وقت توجہ کا مرکز بنا جب سوشل میڈیا پر ایک ویڈیو گردش کرنے لگی جس میں صبا قمر کو ڈریسنگ روم میں ایس پی کی وردی پہنے دیکھا گیا۔ ویڈیو سامنے آنے کے بعد اداکارہ نے ایک میگزین کی پوسٹ ری شیئر کی، جس میں ان کے حق میں مؤقف اختیار کیا گیا تھا۔
میگزین کے ایڈیٹر ان چیف نے طنزیہ انداز میں لکھا کہ کیا یہ توقع کی جا رہی تھی کہ وہ پولیس افسر کا کردار دلہن کے لباس یا لان کے سوٹ میں ادا کریں گی۔ ان کا کہنا تھا کہ اداکار ہمیشہ کردار کی مناسبت سے لباس پہنتے ہیں، نہ کہ کسی کی من گھڑت سوچ کے مطابق۔
اس بیان پر ردِعمل دیتے ہوئے صبا قمر نے مزاحیہ انداز اختیار کیا اور لکھا کہ اوہ خدایا، آج کل میں بہت زیادہ مشہور ہو گئی ہوں، ساتھ ہی انہوں نے مسکراتے ہوئے ایموجیز بھی شامل کیے۔
واضح رہے کہ یہ درخواست وکیل آفتاب باجوہ نے شہری وسیم زوار کی جانب سے دائر کی ہے، جس میں مؤقف اپنایا گیا ہے کہ کسی بھی فرد کو سرکاری اجازت کے بغیر پولیس کی وردی یا ایس پی کے عہدے کا بیج استعمال کرنے کی اجازت نہیں۔
