وفاقی وزیر برائے انفارمیشن ٹیکنالوجی شزہ فاطمہ نے کہا ہے کہ 2030 تک ملک میں مصنوعی ذہانت (AI) کے شعبے میں 30 لاکھ نئی ملازمتوں کے مواقع پیدا ہوں گے، جب کہ اس سے قومی معیشت کی مجموعی پیداوار (جی ڈی پی) میں 7 سے 12 فیصد تک اضافہ متوقع ہے۔
ان کا کہنا تھا کہ نیشنل اے آئی پالیسی ایک جامع روڈ میپ ہے جس کے تحت پاکستان نہ صرف اے آئی کے محفوظ اور مؤثر استعمال کو فروغ دے گا بلکہ عالمی سطح پر اس میدان میں قائدانہ کردار بھی ادا کرے گا۔
ادھر وفاقی وزیر سائنس و ٹیکنالوجی خالد مگسی سے رومانیہ کے سفیر نے ملاقات کی، جس میں دونوں ممالک کے درمیان سائنس اور ٹیکنالوجی کے شعبے میں شراکت داری کو مزید مضبوط بنانے پر اتفاق کیا گیا۔
رومانیہ کی جانب سے پاکستان کو یورپی فنڈنگ پروگرامز میں شمولیت کی پیشکش کی گئی، جس پر وفاقی وزیر نے کہا کہ ان پروگرامز کے ذریعے پاکستان کو ٹیکنالوجی کے شعبے میں نئی راہیں ملیں گی۔ ان کا کہنا تھا کہ رومانیہ اس وقت یورپ کا ابھرتا ہوا آئی ٹی مرکز ہے اور پاکستان کے ساتھ تعاون بڑھانے کا خواہاں ہے۔
