اسلام آباد(نیوزڈیسک) وزیر برائے دفاع، دفاعی پیداوار اور ایوی ایشن خواجہ محمد آصف کی زیر صدارت چار گھنٹے سے زائد کا اجلاس ہوا جس میں انہیں سیکرٹری ایوی ایشن نے وزارت ہوا بازی کے کردار، قومی ایوی ایشن پالیسی 2023، پاکستان ایوی ایشن انڈسٹری کو درپیش چیلنجز ، نشوونما کے مواقع اور دیگر ممالک کے ساتھ فضائی خدمات کے معاہدوں پر تفصیلی بریفنگ دی۔
وفاقی وزیر کو وزارت کے تحت کام کرنے والے اداروں بشمول پاکستان ایئر لائنز کارپوریشن لمیٹڈ، پاکستان سول ایوی ایشن اتھارٹی، پاکستان ایئرپورٹ اتھارٹی، بیورو آف ایئر سیفٹی انویسٹی گیشن، ایئر پورٹ سیکیورٹی فورسز اور محکمہ موسمیات کے بارے میں بھی بریفنگ دی گئی۔
پی آئی اے سی ایل کے بارے میں بریفنگ دیتے ہوئے وزیر نے ریمارکس دیئے کہ پی آئی اے سی ایل کی نجکاری اس حکومت کی ترجیح ہوگی۔ انہوں نے روزویلٹ ہوٹل کے مکس یوز ری ڈیولپمنٹ کے لیے مشترکہ منصوبے کی بھی تعریف کی۔
وفاقی وزیر خواجہ محمد آصف نے پاکستان کی ایوی ایشن انڈسٹری کو ملک کے جی ڈی پی میں حصہ بڑھانے کے حوالے سے ترقی دینے کے عزم کا اظہار کیا۔
انٹرنیشنل فنانس کارپوریشن (آئی ایف سی) نے وزیر کو پہلے مرحلے میں اسلام آباد انٹرنیشنل ایئرپورٹ، جناح انٹرنیشنل ایئرپورٹ کراچی اور علامہ اقبال انٹرنیشنل ایئرپورٹ لاہور سمیت تین بڑے ایئرپورٹس کی آؤٹ سورسنگ کی تازہ ترین ترقی کے بارے میں آگاہ کیا۔
میٹنگ میں وفاقی سیکرٹری سیف انجم، چیف ایگزیکٹو افسر پی آئی اے سی ایل ائیر مارشل عامر حیات، ڈی جی سول ایوی ایشن اتھارٹی خاقان مرتضی، ڈی جی اے ایس ایف میجر جنرل آصف عدنان جاہ، چیرمین پی آئی اے آئی ایل شوکت علی، ڈی جی پی ایم ڈی صاحب زاد خان اور دیگر اعلی افسران نے شرکت کی.
