لاہور ہائیکورٹ کے نام کا جعلی خط بنانے پر سول جج کی اہلیہ، سسر اور سالے کے خلاف درج مقدمہ خارج کر دیا گیا ہے۔ جسٹس طارق محمود باجوہ نے کیس کی سماعت کی جس کے بعد عدالت نے سول جج کی اہلیہ، سسر اور سالے کی درخواست ضمانت نمٹا دی۔ عدالت نے پولیس رپورٹ کی روشنی میں درخواست ضمانت نمٹائی جبکہ تفتیشی افسر کے مطابق مقدمہ بے بنیاد درج ہوا اور تفتیش میں جعلی خط لکھا جانا ثابت نہیں ہوا۔
رواں سال بیرون ملک جانے والے پاکستانیوں کی حیران کن تعداد سامنے آ گئی
سول جج کی اہلیہ انم، سسر الیاس اور سالے حسیب نے ضمانت کے لیے عدالت سے رجوع کیا تھا جن کی جانب سے وکیل وقار اے شیخ نے دلائل دیے۔ وکیل نے عدالت میں مؤقف اختیار کیا کہ سول جج تاندلیانوالہ علی رضا نے بیوی کا جعلی اجازت نامہ بنا کر دوسری شادی کی اور جعلی اجازت نامہ بنانے پر بیوی نے سول جج کے خلاف مقدمہ درج کروا دیا۔ ملزمان کے وکیل کے مطابق سول جج نے مقامی بار سے ملی بھگت کر کے ہائیکورٹ کے نام کا جعلی لیٹر بنایا اور اس جعلی لیٹر کو اپنی پہلی بیوی، سسر اور سالے سے منسوب کر کے مقدمہ درج کروا دیا۔ عدالت سے استدعا کی گئی تھی کہ بے بنیاد مقدمے میں ملزمان کی ضمانت منظور کی جائے۔
