**لاہور ہائیکورٹ میں مریم نواز اور عظمیٰ بخاری کے خلاف توہینِ عدالت کی درخواست دائر**
لاہور ہائیکورٹ میں وزیراعلیٰ پنجاب مریم نواز شریف اور صوبائی وزیر اطلاعات عظمیٰ بخاری کے خلاف توہینِ عدالت کی درخواست دائر کر دی گئی ہے۔ یہ درخواست شہری منیر احمد کی جانب سے وکیل اظہر صدیق کے ذریعے جمع کرائی گئی ہے۔
حکومت سیاسی و جمہوری اصلاحات پر مذاکرات کیلئے تیار، 2024 کے الیکشن پر کوئی بات نہیں ہوگی
درخواست میں الزام لگایا گیا ہے کہ پنجاب پراپرٹی آنرشپ آرڈیننس سے متعلق عدالتی حکم پر دونوں شخصیات کے تنقیدی بیانات توہینِ عدالت کے دائرے میں آتے ہیں۔ درخواست گزار کا مؤقف ہے کہ ان بیانات سے عدلیہ کی ساکھ متاثر ہوئی ہے اور عدالتی حکم کو سیاسی رنگ دینے کی کوشش کی گئی ہے۔
درخواست میں کہا گیا ہے کہ عدالتی فیصلے کو "لینڈ مافیا کے حق میں” قرار دینا ایک سنگین الزام ہے، اور اعلیٰ عہدیداروں کے ایسے بیانات عدالتی عمل کو متاثر کر سکتے ہیں، جو آئین و قانون کے خلاف ہے۔
درخواست گزار نے عدالت سے مطالبہ کیا ہے کہ دونوں شخصیات کو توہینِ عدالت کا شو کاز نوٹس جاری کیا جائے اور ان کے خلاف قانونی کارروائی عمل میں لائی جائے۔
یہ درخواست ایسے وقت میں دائر کی گئی ہے جب پنجاب پراپرٹی آنرشپ آرڈیننس پر لاہور ہائیکورٹ کے حالیہ فیصلے کے بعد سیاسی و قانونی حلقوں میں بحث جاری ہے۔
